Karamus: PDK bi stratejîyê dişmenî têgêreno

• Hemserekê KNKyî Ahmet Karamusî va, “PDK bi têgêrayîşanê xo zirar dano destvisteyanê Kurdan.”

Tirkîya 17ê Nîsane ra nat bi paştîdayîşê PDKyî vera Zap, Metîna û Avaşînî hêrîşanê xo ramnena. Hetê hêzanê PDKyî ra rayîrî yenê viraştene û hêrîşan de gişta înan esta. 6ê Êlule de koma gerîlayanê HPGyî Xelîfan de raştê herîşa SÎHAyî ameye. Hêrîşe de 3 gerîlayî merde û 2 gerîlayî zî hetê PDKyî ra ameyê girewtene. Hetê Hemserekê KNK(Kongreya Neteweyî ya Kurdistanî)yî Ahmet Karamusî r ana rewşe û têkilîyê Tirkîya û PDKyî ameyê erşnayîş.

Hedef destvisteyê Kurdan ê

Hemserekê KNKyî Ahmet Karamusî va, “Hêrîşa Xelîfanî de hedef destvisteyê Kurdan ê. Tirkîya wazena Kurdî xo mîyan de bikewê şer. Tarîx ra nat no kay ameyo kaykerdene. Wazenê Kurdan cîya bikerê û dima zî tasfiye bikerê. Ma hêrîşanê sey Xelîfanî reya verêne nêvînenê. Nê hêrîşî Kurdan mîyan de teşwişeyan zêdînenê. Nê kerdenê xirabî benê sebebe şerî. Ganî şarê ma vera nê provakasyonan vengê xo berz bikero. Ewro Iraq de krîzêko giran esto. Tirkîya wazena na rewşe ra havile bigera. Tirkîya wazena mintiqa îşxal bikera û eskeranê xo tîya de cabikera.”

Têgêrayîşê PDKyî

Karamusî va, “PDK reya verêne Tirkîya de şerîkîye nêkeno. Serrêk verî zî eynî mintiqa de HPGyijî kewtê dame û mesele nêameye zelalkerdiş. La hêrîşa Xelîfanî ra dîyar beno ke, PDK Tirkîya reyde xebitîyeno. Na şerîkîye hinî hetê şarî ra yena zanayene. Ma verî zî vatibi ke m ana şerîkîye qebul nêkenê. Seba ke destvisteyê Kurdan bêrê çinkerdiş şer yeno kerdene. Malûmatanê PDKyî de waştişê Tirkîya yenê tekrarkerdiş. Vanê ‘Problemê Tirkîya Kurdan reyde çin o, problemê ci PKKyî de esto’. Ma nê fikrî qebul nêkenê.”

‘PDK bi fekê dişmenî qisey keno’

Dewamê qiseykerdişê xo de Karamusî va, “Şerîktîya Tirkîya û PDKyî wextanê peyênan de bîya pîle. Partîya Kurdistanî ya ke vajo ez destvisteyanê Kurdan pawena, ganî nîya têmegêra. PDK bi fekê dişmenî qisey keno û bi stratejîyê dişmenî têgêreno. Hêrîşa Xelîfanî ver şarê mintiqa kewto mîyanê teşwişeyan.”

‘Dewletan pêkerd’

Karamusî va, “Seba ke destvisteyanê Kurdan çin bikerê, dewletanê kolonyalîstan pêkerd. Tirkîya sivîlî bomba kerdê la ame astengkerdiş ke no hetê PDK û Iraqî ra bêro rojaneyî. No do hetê stratejîyî ra Kurdan bifîno taluke. Iraq kewto mîyanê krîzê sîyasîyî. Verê nê krîzî vera îşxalê Tirkîya şarê Iraqî weriştibi payan ser. Her kes vatêne gelo PDK do se bikero la înan çîyêk nêkerd. Eke PDK raşta zî welatperwer o, wa vera kerdenanê Tirkîya çîyêk bikero û mîyanê Kurdan de zî rayîranê dîalogî akero. Ma seba dîalogî çend rey gazîyî kerdê. La çi heyf ke PDK cewab nêda gazîyanê ma. La ma fikrê xo de israr kenê. Ganî seba vergirewtişê şerîkîya Tirkîya û PDKyî dezge û sazgeyê Kurdan înîsîyatîf bigerê. Seba ke destvisteyê Kurdan bêrê çinkerdiş, dewletanê kolonyalîstan pêkerdo. Ma ganî bi stratejîyo neteweyî vera înan de vinderê.”

‘Ma fînalê şerî de yê’

Hemserekê KNKyî Ahmet Karamusî peynî de va, “Statuyê Kurdan ame qebulkerdiş û hema zî nîqaş beno. Ma hinî rasayê fînal. Dişmenê Kurdan zî hinî baş zanê. Nînan ra yew zî Tirkîya ya. Tirkîya nê şerî sey sere estbîyayîş û çinbîyayîşî vînena. Coka wazena her firsendî bierjna û wazena mîyanê Kurdan de şerêk biveja. Ma vînenê ke mîyanê dezge û sazgeyanê Kurdistanîyan de vera şerîktîya Tirkîya û PDKyî nêrehetîyêk esta. Kurdî ça de biwazê azad bibê, Tirkîya wazena verê ci bigera û her kes zî hinî kerdenanê înan vîneno. Ma fînalê şerî de yê. Seba ke ma serbikewê, ganî her kes wezîfeyê xo cabiyaro. KNK hedre yo ke meseleyanê zereyî çareser bikero.”

MA / MERKEZÊ XEBERAN