Mazlûm Ebdî: Eke hêrîşî dewam bikerê do her kes zirar bivîno

Fermandarê Pêroyî yê QSDyî Mazlûm Ebdîyî va, “Dewleta tirke hêrîşanê xo biramna her kes do ci ra zirar bivîno. Şer do her ca ra vila bibo.”

Fermandarê Pêroyî yê QSDyî Mazlûm Ebdîyî derheqê hêrîşanê Tirkîya de Ronahî Tv rê qisey kerd. Ebdîyî d3iyar kerd ke Şehba ra heya Dêrik xeylê cayî ameyê bombakerdiş û va, “Nê hêrîşan de sivîlî û nixtayê eskerîyî pîya hedef gêrîyayê. Hem hêzê ma hem zî eskerê rejîmî hedef gêrîyayê. Şehîdê ma û birîndarê ma estê. Goreyê malûmatê ke rasayê ma do hêrîşî wextêkna dewam bikerê.”

‘Serrêk ra nat hedreyîye yena kerdene’

Ebdîyî va, “Eleqeyê ma hêrîşa Îstanbûlî de çin a. Ma verê cû zî îfade kerdibi. Pêroye dinya zî na rasyîye zana. Na hêrîşe de têkilîya hêzanê Kurdan çin a. No kayê îstîxbaratê Tirkan o. Bi destê çeteyanê Tirkîya ameya kerdene. Wazenê hêzanê m abi na hêrîşa sûcdar bikerê. Ganî her kes bizano ke, hedreyîyê nê hêrîşanê ke nika yenê kerdene serrêk ra nat dewam kenê. La dewleta Tirke hêrîşa Îstanbûlî xo rê kerde mexne.”

‘Şer do tena mintiqa de memano’

Dewamê qiseykerdişê xo de Ebdîyî va, “Tirkîya wazena heyf bigera û mintiqa veng bikera. No kayê Erdoganî yo û seba weçînitişan yeno kaykerdene. Îradeyê ma bi hêrîşanê winasîyan nêşikîyeno. Hêzanê ma xo hedre kerdo. Coka do meeşkê zaf zirar bidê hêzanê ma. La eke dewleta Tirke hêrîşanê xo biramna, do her kes zirar bivîno. Ma nêwazenê şerêko pîl biqewimîyo. Eke dewleta Tirke şer de israr bikera, ma seba xoverdayîşê pîlî hedre yê. O wext do şer her ca ra vila bibo û her kes ci ra zirar bivîno. Ma pêroyê têkildaran ra vanê, wa berpirsîyarîya xo ca biyarê û wa hêrîşanê wehşîyan ê dewleta Tirke bivindarnê.”

Mazlûm Ebdîyî peynî de va, “Goreyê malûmatanê ma do borbardimanî wextêkna dewam bikerê. Nika hema erdî ser de têgêrayîşê dewleta Tirke çin o. Ma zî hetê eskerî ra tedbîrê xo girewtê. Seba ke şarê ma zirar mevîno, ganî goreyê dîrektîfanê ewleyîye têbigêro.”

MERKEZÊ XEBERAN