MED-TUHAD DER: Ma vera komploya 9ê Teşrîna Verêne vejîyê meydanan

MA / Eylem AKDAG / AMED

MED-TUHAD DERî seba rayîrşîyayîşanê vera komploya 9ê Teşrîna Verêne gazîya beşdayîye kerde.

MED-TUHAD DERî 30ê Êlule de kongreya xo ya dîyine viraşte. Hemserekê neweyî yê federasyonî Kerem Canpolatî dîyar kerd ke do çalakîyanê xo bizêdînê. Ey dîyar kerd ke ê do bibê beşdarê rayîrşîyayîşanê ke do serrgêra komploya Teşrîna Verêne de yenê kerdene bibê û gazîya beşdarîye ameye kerdene.

Tecrîd tewir bi tewir bandor keno

Canpolatî va, “Tena yew bandorê tecrîdî ney, tewir bi tewir bandorê xo estê. Şexsê komelê Kurdî de pêro komel binê tecrîdî de yo. Seba ke Tirkîya de normalîye bikewa kare ganî tecrîd bêro wedartene. Ganî cade pêvînayîşî bêrê kerdene. Ma pêro raya pêroyîye rê gazîye kenê ke wa meseleya tecrîdî de bibê wayîrê xesasîyetî.”

Komploya 9ê Teşrîna Verêne

Canpolatî va, “Ma do vera bêhiqûqîyan bêveng mebê. Meseleya tewr acîle girewteyê nêweş ê. Seba taloqkerdişê înfazê înan ma do xebatan biramnê. Reyna meseleya tecrîdî zî esta. Ma nêzanê Îmrali de çi qewimîyeno. Seba ney zî ma do 9ê Teşrîna Verêne de dest bi çalakîyan bikerê.”

Canpolatî dîyar kerd ke 9ê Teşrîna Verêne de do Amed de rayîrşîyayîş bêro kerdene û dîyar kerd ke no rayîrşîyayîş zaf muhîm o. Canpolatî va, “Tecrîdêko komelkî yeno ramitene. Eke bi girseyî şar wayîr bivejîyo û bibo beşdarê rayîrşîyayîşî do tecrîd bêro wedartene. Ganî her kes bibo wayîrê xesayîyetî. Sebebê şerî dewamkerdişê tecrîdî yo. Hetêk ra zî bêvengîya însanan zî bena sebebê nê polîtîkayan. Ganî şar 9ê Teşrîna Verêne de bi girseyî bibo neşdarê çalakîyan. Ocalan rayberê şarî yo û vateyê ci şarî ser de bandor kenê. Ganî bieşko keyeyê xo û awiqatanê xo reyde pêvînayîşan bikero.”