Mexmûr de şar serkewt: Ma do xoverdayîşê xo biramnê

MA / ZEYNEP DURGUT

Hemserekê Meclîsê Şarî yê Mexmûrî Yusuf Karayî dîyar kerd ke netîceya xoverdayîşî de pêvînayîşî bîyê û beno ke tayê qanûnî bêrê vurînayene.

Artêşê Iraqî waşt 20ê Gulane de Kampa Mexmûrî bigero binê abluka la xovertdayîşê şarî ver na kerdena înan ameye pûçkerdene. Netîceya pêvînayîşan de artêşê Iraqî têpîya ancîya. Hemserekê Meclîsê Şarî yê Mexmûrî Yusuf Karayî derheqê pêvînayîş û pêameyîşan de erjnayîşî kerdê.

Karayî va, “Ma zulmî ver koç kerd. Se beno wa bibo ma waşt probleman safî bikerê. Hukmatê Iraqî zî heta cayêk îqna bîyo. Ê zî zanê ke îdîayê Barzanîyan û Tirkîya bêbinge yê. Pêvînayîşo peyên de înan hîna baş fam kerd. Îxtîmal esto ke tayê qanûnan de vurîyayîşî bibê. Serê înan de zî tedaya sîyasî esta. Ê nê zî nênimnenê û bi eşkera vanê. Înan ser de tedaya Barzanîyan û dewletanê bînan esta. Tedayan ver hukmatê Iraqî ame tîya.”

Karayî dîyar kerd ke înan Iraqî ra waşto wa vera hêrişanê hewayî Tirkîya îqaz bikerê.

‘Eke ma bibê yew ma benê bihêze’

Karayî dîyar kerd ke artêşê Iraqî têpîya ancîyayo û hetê Iraqî do heyetêk bêro kampe. Karayî va, “Şar ganê xo zî bido do xoverdayîşê xo biramno. Şar do çirey xoverdayîşê xo meterikno. Ma hêvî kenê ke nika ra têpîya wa gamê raştî bêrê eştene. No proses de xeylê cayanê Kurdistanî ra şarê ma paştî da ma. No zî mojna ma ke, eke me bibê yew ma benê bihêze. Eke waştişê ma heq ê, o wext heta ma înan dest bifînê ma do xo ver bide.”