‘Paradîgmaya ey bandor kerd’

şemî 30 tîrmehê 2022 - 14:37

  • Kampanyaya Azadîya Ocalanî: Heta netîceyêk bigera do birama.

ERGÎN ÇAGLAR / MA

Sîyasetmedare Nursel Aydogane va, “Bi tecrîdî wazenê vernîyê paradigmaya Birêz Ocalanî bigerê.”

Serekê PKKyî Abdullah Ocalan 23 serran ra na hepisxaneyê Îmraliyî de binê tecrîdî de yo. 16 aşman ra nat zî ci ra xebere nêgêrîyena. Keye û awiqatanê ci ra muraceatî benê la pêvînayîşêk nîno viraştene. Naye ser o 29 baroyan ra 775 awiqatan mabênê 10-17ê Hezîrane de seba pêvînayîşî mucaceat kerd. Ewrûpa de zî çalakîya nobetî kewta serra xo ya 11ine.

Sîyatsetmedare Nursel Aydogane, derheqê polîtîkayanê tecrîdî û kampanyayan de ser o qisey kerda.

‘Ganî Birêz Ocalan azad bo’

Nursel Aydogane va, “Komela Tirkîya netîceyanê tecrîdî cuwîyena. Demokrasî, haştîye, heqê merdiman zirar vînenê û ekonomî qedîyayo. Ganî tecrîd bêro wedartiş û Tirkîya biba demokrate. Naz î girêdayîya çareserkerdişê meseleya Kurdan a. Seba ke çareseriyêk biba û haştîye bêra awankerdiş, ganî Birêz Ocalan azad bo.”

Aydogane va, “Giranbîyayîşê tecrîdî girêdayîyê rewşa Rojhelatê Mîyanênî yo. Rojhelato Mîyanên cayêko têmîyanêk o. Na mintiqaye de nika şerê cihanî yo 3yin dewam keno. Serdestî wazenê tîyayî bi polîtîkayanê xo bigerê binê kontrolê xo. Paradîgmaya Birêz Ocalanî şaranê Rojhelatê Mîyanênî ser de bandor kerd. Bi paradigmaya ‘Demokratîk Konfederalîzm’î seba şaran û cinîyan cuyêka newîye ameye awankerdiş. Merdimî esaretî ra xelisîyayê û bîyê azad. Nê şarî vanê ma azadîya Birêz Ocalanî sey azadîya xo vînenê.”

‘Cayê çareserîye Îmrali yo’

Sîyasetmedare Nursel Aydogane va, “Kurdî Lozanî ra nat vera dewletanê netewîyan xo ver danê. Kurdî hinî nêwazenê bêstatu bicuwîyê. Seba çareserîye meseleya Kurdan, ganî tecrîd bêro wedartiş û Birêz Ocalan biraso azadîya xo ya fîzîkî. Kurdî bi serran ra nat vanê cayê çareserîye Îmrali yo.”

‘Nêşkayê Ocalanî biancê xeta xo’

Aydogane va, “Tirkîya û hêzê mîyanneteweyî seba çareserîye hedre nîyê coka tecrîdî giran kenê. Îdareyo Xoser o ke Bakur û Rojhelatê Sûrîyeyî de bi paradigmaya Birêz Ocalanî ame awankerdiş, Tirkîya û hêzanê mîyannetewîyan nêrehet keno. Nêwazenê fikrê ey bicuwîyê. Birêz Ocalanî wextê prosesî de vatibi, ‘Rojava xeta min a sûr a’. Seba ke nêşkayê Abbullah Ocalanî biancê xeta xo, tecrîdî giran kenê.”

Heta netîceyêk bigera do birama

Sîyasetmedare Nursel Aydogane derheqê kampanyaya azadîya Ocalanî de va, “Çalakîyan ra rey-rey netîceyî vejîyayê la seba çareserîyêk netîceyêk nêameye girewtene. Meseleya Kurdan, mesleyêka pîl a û bîya mesaleyêka mîyanneteweyî. Çalakîyî bi fikre ‘Nika Wextê Azadîye yo’yî yenê ramitene. Ganî Kurdê Ewrûpayî û paştîdayoxê înan heta netîceyêk bigerê xoverdayîşê xo biramnê. Konferansê Lozanî de Kurdî ameyê têhet û do xeylê çalakîyî bêrê viraştene. Ganî Kurdî seba cuyêka azade hîna zêde bixebitîyê û xoverdayîşê xo pîl bikerê.”

 

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.