Parlamentero Îngîlîz: Ocalan ganî azad bo

• Parlamenterê Îngîlîz Lloyd Russell Moyle: Ocalan Mandelayê Rojhelatê Mîyanênî yo. Ma ganî hîna zêde vengê xo bikerê. Têgêrayîşê CPTyî qîm nêkenê.

Parlamenterê Partîya Karkeran a Îngîltereyî Lloyd Russell Moyle beşdarê kongreya HDPyî bi û va, “Ocalan Mandelayê Rojhelatê Mîyanênî yo. Ma ganî hîna zêde vengê xo bikerê. Têgêrayîşê CPTyî qîm nêkenê.”

Ewrûpa ra, Rojhelato Mîyanên ra û Afrîkaya Başûre ra xeylê sîyasetmedarî beşdarê kongreya 5ine ya HDPyî bîyê. Partîya Keske ya Norveçî ra parlamenter Bente Knagenhjelm, Partîya Karkeran a Îngîltereyî ra parlamenter Lloyd Russell Moyle û Sekreterê Pêroyî yê Unite the Unionî Tony Burkeyî derheqê kongre û rewşa pêroyîye de Ajansê Mezopotamyayî rê qisey kerdo.

Ocalan nameyo kilît o

Bente Knagenhjelmî va, “Çareserkerdişê meseleya Kurdan de Ocalan nameyêko kilît o la ganî firsend bidîyo ke mîsyonê xo biyaro ca. Ez zana ke Ocalan eşkayêne na meseleye çareser bikero la vengê ey nêame goşdarîkerdiş. Tecrîdo ke ey ser de yeno ramitene nîno qebûlkerdiş. Ganî Mehkemaya Heqanê Merdiman a Ewrûpayî hîna zêde bala xo bida na meseleye ser. Rewşa Ocalanî maneno yê Mandelayî. Têgêrayîşê CPTyî qîm nêkenê. Ma ganî hîna zêde vengê xo vejê. Prosesê tecrîdî hinî bîyo îşkenceyêk.”

Seba çareserîye ganî Ocalan azad bo

Sekreterê pêroyî yê Unite the Unionî Tony Burkeyî va, “Tecrîdo ke Ocalanî ser de yeno ramitene vera heqê merdiman hêrîşêka leyşin a. Ma Îngîltere de sendika û înîsîyatîfan reyde seba azadîya Ocalanî kampanyayan ramnenê. Seba çareserîye ganî Ocalan azad bo. La çi heyf ke Erdogan vera Kurdan û demokratan hêrîşanê xo ramneno. Seba çareserîye ma ganî bixebitîyê.”

Mandelayê Rojhelatê Mîyanênî
Burkeyî dewamê qiseykerdişê xo de va, “Ocelan wayîrê giranîye yo û wayîrê tecrubeyî yo. Komele de wayîrê hurmetî yo. Coka ey ra hende tersenê. Ocalan raşta zî Mandelayê Rojhelatê mîyanênî yo. Ganî mas ey kampanyayanê Mandelayî kampanyayan bivirazê. Nê kampanyayî Ewrûpa de hîra benê û do Amerîka de zî hîra bibê. Ma xeylê sendîqayî vistê mîyanê kampanyayan. Erdogan ferasetê Ocalanî ra terseno. Zano ke Ocalan do komele bîyaro têhet.”

Kongraya HDPyî de mesajê muhîmî ameyê dayene

Lloyd Russell Moyleyî derheqê kongreye de va, “Hetê hemserekan ra mesajê muhîmî ameyê dayene. Seba çareserîye ganî girewteyê sîyasî û Birêz Ocalan azad bibê. Kongreye de derheqê meseleyanê muhînan û xeylê cîhetan mesajê muhîmî ameyê dayene. Eke partîya ma serbikewa, ma do seba şikitişê tecrîdî û azadîya Birêz Ocalanî têbigêrê. Eke Tirkîya gamanê xo yê antîdemokratîkan biramna, ma do têkîlîyan newe ra bierjnê. Ma do çekan medê Tirkîya, çimkî ma zanê ke Tirkîya çekan bi meqsedanê xo şuxilnena.”

YENÎ YAŞAM