Parlamentoya Kurdistanî do derheqê hêrîşan de rapor hedre bikera

Parlamentoya Kurdistanî ra heyetêk do derheqê hêrîşanê Tirkîya û Îranî de raporêk hedre bikero û pêşkêşê parlamenteran bikero.

Hetê Tirkîya û Îranî ra mintiqayê Balakeyetî û Brodostî wextêk ra nat yenê bombakerdiş. Seba ke nê hêrîşan ser o raporêk bêro hedrekerdiş, Parlamentoya Kurdistanî de heyetêk ameyo awankerdiş.

Hetê endamanê heyetî ra Çoman ame zîyaretkerdiş. Zîyaretî ra dima do derheqê hêrîşanê Tirkîya û Îranî de raporêk bêro hedrekerdiş. Pêvînayîşan ra dima, heyet şi dewa Werdî ya ke Çomanî ya ameybî vengkerdiş. Hetê Serekê Komîsyonî Rêving Hirurîyî ra derheqê kombîyayîşî de malûmatêk ame dayene.

Rêving Hirurîyî va, “Ma seba ke hêrîşanê Tirkîya û Îranî yê Balakeyetî û Bradostî ser o cîgêrayîşan bikerê ameyê tîya. Ma do derheqê hêrîşan de raporêk hedre bikerê û pêşkeşê parlamentoye, serekwezîrîye û serekkomarîye bikerê. Ma raporê xo do seba ke hêrîşî bêrê vindarnayîş û zirarî bêrê telafîkerdiş hedre bikerê.

Cigêrayîşê komîsyonî nika Sidiqan ê mintiqaya Bradostî de dewam kenê.

ROJNEWS/HEWLÊR