Rêxistinê komelê sivîlî: Ganî waştişê girewteyan bêrê caardene

MA / Ceylan ŞAHÎNLÎ / RIHA

Îdarekaranê ÎHD, OHD Û SESî yê Rihayî dîyar kerd ke waştişê girewteyan heq ê û ganî bêrê caardene.

Hepisxaneyanê Tirkîya û Kurdistanî de, çalakîya grevê vêşanîye yo ke bi waştişê ‘Abdullah Ocalanî rê azadî, meseleya Kurdan rê çareserî’ yena kerdene 25 rojî yo dewam kena. Hetê îdarekaranê OHD, ÎHD û SESî yê Rihayî ra grevê vêşanîye ame erjnayene.

Hemverfekê Komîsyonê Hepisxaneyan ê OHDyî yê Rihayî Serhat Kurtî va, “Waştişê girewteyan heq ê. Vera polîtîkayanê şer û tecrîdî girewteyan sey serranê verênan çalakîya grevê vêşanîye ramnenê. Vera Birêz Ocalanî roja verêne ra nata tecrîd yeno ramitene û no tecrîd hînî rasayo asta îşkenceyî. CPTyî roporê xo yê peyêne de Tirkîya hişyar kerdibî. Bitaybetî 15ê Temûze ra dima hiqûq ame wedartene. Polîtîkayanê AKP-MHPyî ver ma ameyo nê rojan. Çunke bi hiqûqî ney, sîyasî têgêrenê.”

‘Gİrewteyan xoverdayîşê xo nêterikna’

Hemverfekê Komîsyonê Hepisxaneyan ê ÎHDyî yê Rihayî Halîl Akbaşî dîyar kerd ke girewteyan xoverdayîşê xo nêteriknayo û va, “Ma ganî mîyanê sînoranê hiqûq û demokrasîyî de bivejîyê kuçeyan û vengê xo berz bikerê. Ma ganî vajê ke ma wazenê azad biciwîyê û seba ney zî ganî Birêz Ocalanî ser ra tecrîd bêro wedartene. Ma zanê ke, fikre Birêz Ocalanî do Kurdistan, Tirkîya û Rojhelato Mîyanên de vernîya sîyasetî akero. Fikrê ey do haştîye awan bikerê û ma ganî fikranê ci bieşnawê.”

Hemserekê SESî yê Rihayî Ferhat Demîrî dîyar kerd ke girewteyî heqê sihetî ra mehrûm manenê û va, “Goreyê malumatê ke rasayê ma, zadê ke ganî girewteyî bigerê nêdîyenê înan. Hetê girewteyan ra vera kerdenanê antîdemokratîkan çalakîya grevê vêşanîye yena kerdene. Girewteyî na rewşe de raştê binpaykerdişan yenê. Bi muqaveleyanê Tokyo û Maltayî heqê girewteyê ke kewenê grevê vêşanîye gêrîyayê binê garantîyî. Ganî goreyê nê muqaveleyan têbigêrê.”