Rojnameyê Yenî Yaşamî 4 serre yo

Yenî Yaşam 25ê Gulane 2018î de kewto rayîr û bîyo 4 serre.

Rojname serrgêra xo bi surmanşetê ‘Çinarêra 4 serrî’yî pîroz kerd.  Serrgêra rojnameyî de xebatkaran va, “Ma ewro 4 serrê xo qedînayê û ma kewtê serra pancine. Eke şima bayîyan de rojnameyê ma nêşkenê peyda bikerê, şima eşkenê rojnameyê ma rê bibê e-abone. Ma do şarê xo bê xeberan meverdê. Ganî şima paştî bidê ma. Bi hêvîya emrêkî dergî.”

‘Qelema Apê Mûsayî ha nusena’

Rojnameyî seba serrgêra xo vîdeoyêk hedre kerdo. Înan video de vato, “Rojnameyê ma Yenî Yaşam 4 serre yo. Qelema Apê Mûsayî hema ha nusena. Ma hem bayîyan de, hem kuçeyan de û hem mecrayanê dîtîtalan de şima reyde yê. Ma kewtê heqîqetî, azadîye û heqanê merdiman dima. Ma hetê xoverdayîşê cinîyan, kedkaran û bindestan de yê.”

Sergêra rojnameyî Merkezê Kulturî yê Mezopotamyayî yê Îstanbûl de ame pîrozkerdiş. Edîtorê rojnameyî Ender Ondeşî qisey kerd û va, “Ma karê xo kenê û ma do bikerê zî. Nivşê neweyî hê rasenê. Ê do destê ma ra na rêzile bigerê. Ma name û şeklê xo bibedilnê zî, ma do timûtim bibê Ozgur Gundem.” Badê qiseykerdişan, serrgêre bi deyîran ameye pîrozkerdiş.

ÎSTANBÛL