Şarê Dîyarbekirî ra vera hêrîşan: Ê do merasê armancê xo

• Şarê Dîyarbekirî vera hêrîşanê Tirkîya nêrazîbîyayîşê xo vatê û şar dîyar kerd ke, hêrîşî destvistetanê Kurdan rê benê.

Hêrîşê Tirkîya yê ke vera Bakur û Rojhelatê Sûrîyeyî 20ê Teşrîna Peyêne ra nat yenê kerdene bêmabên dewam kenê. Hêrîşan ver xetê enerjîyî, nêweşxaneyî, wndegehî, awanîyê bawerîye û cayê sivîlî zeraranê pîlan vînenê. Hêrîşî hetê şarê Dîyarbekirî ra şermezar bîyê û şarê Dîyarbekirî dîyar kerd ke, wexto ke mesele Kurdî bê îqtîdar û muxalefet benê yew.

‘Hêrîşî pêro Kurdan rê benê’

Şarê Dîyarbekirî ra Şerîf Kizilî va, “Ê zî Kurd ê, ma zî Kurd ê. Eke înan rê zulim beno, ma rê zî beno. Nê hêrîşan kenê ke wa Kurdî mewirzê payan ser. Bakur, Başûr, Rojava, Rohhelat ferq nêkeno. Nêwazenê Kurdî wayîrê heqan bê. Ganî Kurdî vera înan bigerê. Eke ma yew mebê, ma do binbikewê.”

‘Armancê înan destvisteyê Kurdan ê’

Welatîyan ra Loqman Şanliyî va, “Armancê hêrîşan destvşsteyê Kurdan ê. Wexto ke vera Kurdan şerêk dest pêbikero, muxalefet zî beno sey îqtîdarî. Krîzî ra û bêhizurîye ra behs nêkenê. Dewlete nêwazena Kurdî azad bê. Amancê hêrîşanê Rojavayî zî no yo. Ganî vera înan yewîtîya Kurdan biba û Kurdî bibê yew. Eke yewîtîya neteweyî meyera awankerdiş, ma nêşkenê meseleyanê xo çareser bikerê.”

‘Mabênê îqtîdar û muxalefetî de ferq çin o’

Welatîyan ra Mehmet Pektaşî derheqê hêrîşa Taksîmî de dîyar kerd ke înan xo rê kerde mehne û va, “Înan bi xo kerd. Armanc îşxalkerdişê Rojava yo û destvisteyê Kurdan ê. Ez sey Kurdêkî nê hêrîşan şermezar kena. Sebebê krîzî polîtîkayê şerî yê. Ma nêşkenê nanêk bere keye. Mabênê îqtîdar û muxalefetî de ferq çin o. Pêroyî vera Kurdan benê yew. Qanûnê bingeyinî yê înan de reyna Kurdî çin ê, Kurdkî çin a.”

‘Butçe şerî rê abirîyena’

Welatî Kutbettîn Porsûkî va, “Sebebê krîzî polîtîkayê şerî yê û no şero gemarin o. Dewlete butçeya xo şerî rê xerc kena. Şer ke mebo, feqîrî û veyşanî zî nêbenê. Wazenê Kurdan bi şerî, bi talanî, bi îşxalî çin bikerê. La Kurdî do meqedîyê û ê do merasê armancê xo.”

MA / AMED