Şarê ma do 14ê Gulane de hesabê ci biperso

în 17 adarê 2023 - 16:34

Hemsereka Pêroyî ya DBPyî Salîha Aydenîze, 40ê erdlerze de Meletî de şarê mintiqa reyde ameye têhet û dîyar kerd ke şar do weçînitiş de hesab biperso.

Erdlerzanê 6ê sibate ser ra 40 rojî vîyartê. Çewresê erdlerze de qezaya Meletî ya Wêranşar de mehlaya Ornekî de loqmeyî ameyê vilakerdene. Hemsereka Pêrpyî ya DBPyî Salîha Aydenîze, Hetkarê Hemserekê Pêroyî yê HDPyî Serhat Eren, parlamentere HDPyî Garo Paylan û Abdullah Koç bîyê beşdarê bernameyê yadkerdişî.

‘Îqtîdar rantî dima wo’

Bernameyî de Hemsereka Pêroyî ya DBPyî Salîha Aydenîze qisey kerd û va, “Na afatêka pîle bî. Sebebê hende xisarê pîlî û mergê hende însanan, polîtîkayanê rantî yê bajarwanîyê û vera şar û bawerîyan polîtîkayanê dişmenîye yê îqtîdarî yê. Roja verêne ya erdlerze ra nat reyna şarê ma, partîya ma û sazîyê komelê sivîlî rasayê hawara şarî.”

Aydenîze dîyar kerd ke, erdlerze ser ra 40 rojî vîyartê la hîna zî birînî nêameyê piştiş û va, “40 rojî vîyartê la hema zî îqtîdar û dewlete seba ke mexdurîyetê şarî safî bibê çîyêk nêkerdo. Merdimî bi îmkanê xo binê enkazî ra kerdenê ke bivejîyê la ê hema zî rantê xo fikirîyayêne. Hema zî problemî safî nêbîyê la îqtîdar hema zî fikirîyeno ke rantî senî vila bikero.”

‘Ma do paştîdayîşî pîl bikerê’

Aydenîze dewamê qiseykerdişê xo de va, “Kesanê ganî îstîfa bikerdêne seba weçînitişî îstîfa kenê. Wazenê îqtîdarî destê xo de bitepişê. Polîtîkayê nê îqtîdarî seba şar û bawerîyan nîyê. Ma do şarê xo reyde pîya birînanê xo bipêşê. Ma do seba pêro gananê xo înan ra hesab bipersê. Înan vîndî kerdo. Ê ganî hesabê kerdenanê xo bidê. Polîtîkayanê şer, dişmenetî û şaran nêşinasnayîşî yê îqtîdarî ver xisar hende giran bîyo. Ê kewtê rantê xo dima. Şarê ma do 14ê Gulane de hesabê nînan biperso.”

MA / MELETÎ

parvê bike

   

Yeni Özgür Politika

© Copyright 2023 Yeni Özgür Politika | Mafên belavkirinê parastî ne.