Şavluk: Ganî şar wayîrê kampanyaya azadîye vejîyo

Hemserekê Beledîyeya Silopîya Suleyman Şavlukî Nobeta Edaletî zîyaret kerd û dîyar kerd ke ganî şar wayîrê kampanyaya azadîye vejîyo.

Serekê PKKyî Abdullah Ocalanî ra 34 aşmî yo xebere nîna girewtene. Kampanyaya ‘Abdullah Ocalanî rê azadî, meseleya Kurdan rê çareserî’ bi çalakîyan dewam kena. Gvevê vêşanîye ke hepisxaneyan de yeno kerdene 37 rojî yo dewam keno. Nobetê Edaletî yê Amed, Wan, Mersîn, Edene, Izmîr û Îstanbûlî zî dewam kenê. 

‘Abdullah Ocalan seba her kesî şans o’

Hemserekê Beledîyeya Silopîya Suleyman Şavlukî Nobeta Edaletî ya Amedî zîyaret kerd û tîya de va, “Kurdî gêrenê heqanê xo. Heqê înan ê qanûnî zî destê înan ra yenê girewtene. Embazê ma seba ke birasê heqanê xo kewtê greve vêşanîye.”

Şavlukî va, “Nêameyo namekerdiş la 40 serrî yo şerêk est o. Birêz Ocalanî dîyar kerd ke mîyanê hefteyêk de eşkenê şerî biqedînê. La kesê ke şer û çekan de karê înan est o nêverdenê no şer biqedîyo. Birêz Ocalan nêşkeno pêvînayîşan bikero û no binpaykerdişê hiqûqî yo. Birêz Ocalan seba Tirkîya, seba Kurdan û seba her kesî şans o. Ganî pêvînayîşî  cade dest pêbikerê. Rayîrê haştîye Îmrali ra vîyareno.”

Gazîya wayîrvejîyayîşî

Şavlukî dîyar kerd ke ganî şar wayîrê kampanyaya ‘Abdullah Ocalanî rê azadî, meseleya Kurdan rê çareserî’ bivejîyo û va, “Kesê ke muhîmîye danê hiqûq û ameyoxî ganî paştî bidê na kampanya. Ganî her kes vengê xo bikero û nê teda û bêhiqûqîyan pûç bikero.”

MA / AMED