Seba rojnamegeranê girewteyan malûmato girseyî

pêncşem 17 teşrînê 2022 - 08:43

  • Hetê DFG û MKGPyî ra seba 16 rojnamegeranê girewteyan vernîya Edlîyaya Dîyarbekirî de malûmat ame dayene.

16 rojnamegerê Kurdî 16ê Hezîrane de ameyê girewtene û girewtişê înan ser ra 5 aşmî vîyertê. Hetê DFG û MKGPyî ra derheqê rewşa rojnamegeran de vernîya Edlîyaya Dîyarbekirî de malûmat ame dayene. Xeylê rojnamegerî û temsîlkarê rêxistinanê sîvîlan malûmatî de ameyê têhet. Malûmat bi Kurdkî û Tirkî ame wendene.

‘5 aşmî ra nat îşkence dewam keno’

Malûmatî de ame vatiş ke, “Embazanê ma seba ke heqîqetî vetê meydan, seba ke înan bêhiqûtîyê îqtîdarî vetê meydan û seba ke bîyê vengê bindest ameyê girewtene. Girewtişê înan bîyo îşkence û çi heyf o ke 5 aşmî ra nat dewam keno.”

‘Çapemenîya azade game têpîya nêeşte’

Ame vatiş ke, “Çi wext ke vera komelî hêrîşî biyê, hêverî xebatkarê çapemenîya azade ameyê girewtiş, qetilkerdiş û cayê kare înan ammeye bombakerdiş. La reyna zî xebatkaranê çapemenîya azade game têpîya nêeşte. Îqtîdarî ameyê û şîyê. AKP zî vera çapemenîya azade hêrîşê xo ramitê. 16ê Hezîrane de 16 embazê ma ameyê girewtene. 25ê Teşrîna Verêne de operasyonêk dîya dest pêkerdene û 10 embazê ma ameyê girewtene. Sey verî polîsan eşt buroyanê ma ser û înan dest na materyalanê ma ser.”

‘5 aşmî yo ke çîyêk nêameyo kerdene’

Dewamê malûmatî de ame vatiş ke, “5 aşmî vîyertê la dosyaya rojnamegeran nêameya temamkerdiş. Hetê mehkemayan ra dosyayê qetîlan, baronan, tecawizkaran bi leze yenê temamkerdiş la yê rojnamegeran de averşîyayîşêk nêbeno. Ma sebebe ci zanê. Wexto ke îddîaname hedre bibo, do bivejîyo ke embazê ma karanê xo ver ameyê girewtene. Do bivejîyo meydan ke, materyalê ke sey sûcî ameyê nîşandayîş kamera û makînayê fotografî yê. Seba ke embazanê ma karê xo kerdo 5 aşmî ra nat girewteyê û derheqê înan de hema îddîanameyêk nêameyo hedrekerdiş.”

‘Wa bi fîzîkî azad bibê’

Peynîya malûmatî de ame vatiş ke, “Wa no bêro zanayîş ke, karê embazanê ma nîme de nêmendo. Çapemenîya azade vera pêro tehdayan xo ver daya û do ver zî bida. No tradîsyon mîyanê şarî ra bingeyê xo geno û çok ronênano. Ganî embazê ma bi fîzîkî azad bibê û mehkemayî zî ganî mebê şerîkê nê şermî.”

MA / AMED

parvê bike

   

Yeni Özgür Politika

© Copyright 2023 Yeni Özgür Politika | Mafên belavkirinê parastî ne.