Sempozyûmê Elewîyan Izmîr de

Sempozyûmê Elewîyan bi roja xo ya 2yine dewam kerd

Roja 2yine ya sempozyûmî de babeta mergî û prosesê sîyabestişî ameyê qiseykerdiş.

Sempozyûmê Elewîyan, hetê Komeleya Şinasdayîşê Kulturê Elewî û Bektaşîyan, Weqfa Kulturî ya Haci Bektaşî Welîyî û Komeleya Kulturî ya Pîr Sultan Abdalî ra ameyo organîzekerdiş. Qiseykerdişê roja 2yine hetê Dr. Cemal Salman, Dr. Dîlek Kizildag û Dr. Hişyar Ozsoyî ra ameyê kerdene. 

Nimûneyê mîtolojîkî

Dr. Cemal Salmanî bi sernameyêk ‘Mekano mîtîk de vateyê Cinîyan’ qisey kerd. Salmanî va, “Elewîtîye de mîtê bingeyinî estê. Meseleyê cinîyan bi bereket û herre temsîl benê. Badê ma vînenê ke hêdî-hêdî homatîye ra kewenê dûrî û hinî bi nameyanê cîya-cîyayan yenê şinasnayene.” Selmanî qiseykerdişê xo de mîtolojîyê xeylê şar û kulturan ra nimûneyî dayê. 

Şiwareyî û sîyabestişî

Dr. Dîlek Kizildage bi nameyê ‘Cinî, Merg, Sîyabestiş, Şiware: Nimûneyê Qoçgîrîyî’ qisey kerde û va, “Qoçgîrî de eşîrê cîya-cîyayî estê û tîya seba Elewîyanê Kurdan cayêko zaf muhîm o. Tîya de qetlîamêko pîl qewimîya. Qetl3iamî ra dima prosesê şiware û sîyabestişan dest pêkerd. Şiwareyî hîna zêde hetê cinîyan ra vajîyenê. Şiwareyê Qoçgîrîyî ekserî Kurdkî yê. Maqûlîya cinazayî bi şiware û sîyabestişan yena hesabkerdiş. Nê şiwareyî eynî wext de sey wesîqayê tarîxî yê.”

Şîyayeyî û mendeyî

Wekîlê Hdpyî Hişyar Ozsoyî va, “Mi tezê xo de ca da pamendanê mezelan. Ganî cendekî bikewê mezelan. Ma pêropîya dî înan çi ard cenazeyanê Ekîn Wan, Hecî Loqman Bîrlîk û Dadîya Aysel Tûxlûke ser. Mezelî yenê şikitene û merdeyî mezelan ra yenê vetene. Ê yê ke sey însanan nêcuwîyenê, sey însanî zî tênêgêrenê. Ma qedir danê merdeyanê xo. Dewlete mergî xo dest de tepişena. Wazena însanan çin bikera. Dewlete ten abi biyolojik nêkişena, bi sembolik zî kişena. Des serranê peyênan de 10 hezar Kurdî bêmezele mendê. Ne merdeyî tam mirenê ne zî gandeyî tam cuwîyenê.”

MA / IZMÎR