Wa PKK lîsteya terorî ra bêro vetene

• Stockholm de bi tewrbîyayîşê kurdan û sîyasetmedaranê Swêdi kombîyayîşêk ame kerdene û ame waştene ke wa semedê dewaya Palme kurdan ra uzro fermî bêro waştene û PKK lîsteya terorî ra bêro vetene.

Paytextê Swêdî Stockholm de derehqê dewaya Olop Palme de kombîyayîşêk ame kerdene. Kombîyayîşo ke sîyasetmedarê kurdan û swêdijan tewr ci bîyî de ame waştene ke wa semedê dewaya Palme kurdan ra uzro fermî  bêro waştene û PKK lîsteya terorî ra bêro vetene.

Hemsereka Merkezê Komelê Demokratîkî yê Kurdan ê Swêdî Nadîya Salehî vat: ''Kurdê ke qet eleqeya înan bi cînayetî çîn a 34 serrî sey sucdarî ameyî ramojnayene ke çîyêko winayên nîno qebulkerdene.''

Reyna mexduran zî derheqê travmayanê xo de qisey kerd û waşt ke înan ra uzro fermî bêro waştene û PKK lîsteya terorî bêro vetene.

Temsîlkarê Kongreya Neteweyîye ya Kurdîstanî (KNK) yê Îskandînavya Sînan Onalî waşt ke hukmatê Swêdî kurdan uzrê xo biwazo û  PKKyî lîsteya terorî vejo.

Parlamentero verên ê Partîya Karkeranê Sosyal Demokratan û Serekê gruba partîye ya Şaredarîya Stockholmî Kadir Kasirgayî zî vat: ''Bi destê dewleta xorî ya tirke kiştişê Palme erzîya serê kurdan. Hema heta serra 2018î de dezgehê fîkrî SETA û MÎTî pîya raporêk kerd amade û PKK bi qetilkerdişê Palmeyî sûcdar kerd. Nika pawitişê ma oyo ke Swêd bi eşkerayîyêke uzrê xo biwazo.''

Parlamenterê Partîya Çepe Daniel Riazatî zî vat: ''Yeno waştene ke dewa bêro akerdene û tezmînat bêro waştene. La çîyo tewr muhîm oyo ke damxeya terorî ke dîyaye Têgêrayîşê Azadîye yê Kurdan ro ganî bêro wedartene.  Watişê ma  oyo ke wa hukmatê Swêdî û Wezîra Karanê Teberî Ann Linde na damxeya terorî serê PKKyî ra wedarê.''

Parlamenterê Partîya Çepe Ton Haddouyî zî vat: ''Sûcdarkerdişê şarê kurdî heme şarê bindestî sey hedef ramojna û hemeyan naye ra tengayîye ante. Wa PKK lîsteya terorî ra bêro vetene.''

ANF