‘Tesîsê nukleerî ra hîna talukeyin o’

• Felaketê Nahalê Zelalî hetê Sedat Cezayîroglûyî ra ame eşkerakerdiş. Sîyanûr têmîyanê çemê Feratî bîyo.

MUJDAT CAN / MA / ERZÎNGAN

Felaketê Nahalê Zelalî hetê Sedat Cezayîroglûyî ra ame eşkerakerdiş. Sîyanûr têmîyanê çemê Feratî bîyo.

2001î de qezaya Erzînganî ya Nahalê Zelalî de madenê zerdan dest bi faalîyetanê xo kerd. Maden destê şîrketa Anagoldî de yo. Seba ke zerdî awguznê, sîyanûr û kîmyewîyê jehrinî yenê gurînayîş. Nê jehran ver ekoloji xeylê zirar dî. Çend rojî verî cû sîyanûrê nê madenî têmîyanê çemê Feratî bi. No feleket hetê Sedat Cezayîroglûyî ra gêrîya video. 

’39 tewirî kîmyasalî yenê gurînayîş’

Sedat Cezayîroglûyî va, “Se ra 80î yê madenanê tîyayî, yê şîrketanê Kanadayijan û Amerîkayijan ê. Sera 20ê madenan zî yê Grûba Çalikî yê. 2001î de tîya de madenê zerdan bi a. No maden Ewrûpa de madeno tewr gird, dinya de zî madeno 3yin o. Hetê gurînayîşê kîmyasalan de zî reqîbê ci çin o. 39 tewirî kîmyasalî tîya de yenê gurînayîş. Goreyê reqemanê resmîyan, her serre tîya de 122 ton sulfîrîk vejîyeno.”

‘Tesîsê nukleerî ra hîna talukeyin o’

Derheqê raporanê madenî de Cezayîroglûyî va, “Goreyê raporanê zanistîyan, no proje tesîsê nukleerî ra hîna talukeyin o. Raporî vanê eke no proje meyero vindartiş, do pêro Tirkîya de vaqayê kanserî bizêdîyê û domanî do bêweslan bêrê dinya.”

‘Çemê Feratî ra 350 metre dûrî yo’

Cezayîroglûyî va, “Cayê gêrayîşî yê madenî, çemê Feratî ra 350 metre dûrî yo. Seba eşteyan hewzê qijkekî ameyê viraştiş. Jehrî nê hewzan ra nesilîyenê û benê mîyanê çemê Feratî. Şîrkete ke karê xo hîra bikera, do 2 qezayê Dêrsimî, Erzîngan Egîn û Sêwas Tefrîke zî bikewê fek a. Ganî no proje bêro vindarnayîş. Eke tîya bêro vindarnayîş, do pêro madenî bêrê vindarnayîş.”