Gelîyê Godernê de qirkerdişo ekolojîk dewam keno

MEDÎNE MAMEDOGLÛ / NÛJINHA / AMED

Gelîyê Goderne do awbendê Silîvanî ver binê awe de bimana. Gelî de darî yenê birnayene û kemerî yenê teqnayene.

Gelîyê Godernê do binê awa awbendî de bimana. Aşman ra nat gelî de darî yenê birnayene. Darî hetê cerdewanan ra yenê birnayîş û bi qamyonan yenê kiriştiş. 

50 dewî do binê awe de bimanê

Awbend ke awe girewt do 50 dewê Pasûr, Farqîn, Licê û Hazroyî binê awe de bimanê. Gelîyê Goderne ya ke hetê ekoloji ra dewlemend a û tarîhî ya do binê awe de bimana. Tarîxê qedîyayîşê awbendî nîno zanayene. Dewayê ke hetê şarî ra ameyêd akerdene zî dewam kenê.

Mintiqa de xeylê darî ameyê birnayene

Endama Meclîsê Ekolojîyî yê HDKyî Melîs Tantane derheqê rewşe de qisey kerd û va, “Gelîyê Godernê û mintiqa hetê bîyotewirîye ra zaf dewlemend ê û warê cuye yê. Ma tîya de zî bandorê polîtîkayê dewlete yê ewlehîye vînenê. Hêverî nê cayan însanan ra pak kenê û dima cuya pêro gandaran rê tehtîdî dest pêkenê. Hema awbend nêvirazîyeyo û nika ra xeylê darî ameyê birnayene. Ma Cûdî de zî bîyê şahidê eynî çîyan. Wazenê nê cayan nê cayan çin bikerê û cuya gandaran biqedînê.”