TJAyî malûmatêk weşana û va, “Xoverdayîşo ke Rojhelat de yeno dayene heq o. Ganî îdamî bêrê vindarnayîş û raya pêroyîye vengê xo berz bikera.”
TJA(Hereketê Cinîyanê Azadan)î, derheqê îdamanê Îranî de û binpaykerdişanê vera cinîyan de malûmatêko nuştekî da. Malûmatî de ame vatiş ke, “Îran de verdayene tena camerdan rê heq a, welayetê domanan dîyeyo piyan, têgêrayîşê cinîyan tim binê kontrolî de yê û çîyê ke goreyê şerîatî mebê cinîyî yenê cezakerdiş.”
‘Hetê cinîyan ra warê xoverdayîşî ameyê awankerdiş’
Malûmatê TJAyî de ame vatiş ke, “Welatê Kurdan bîyo çar lete û Kurdî seba ke nasnameyê xo azad bikerê wextêkî dergi ra nat xo ver danê. Sey cinîyanê Kurdan, ma eynî wext de vera cinsperestîye zî xo ver danê. Komara Îslamî ya Îranî zî sey cîrananê xo hem vera şaranê Îranî hem vera şarê Rojhelatî bi şîdet û tedayan têgêrena.
Cinîyî serran ra nat vera mecbûrîyê sere girewtişî xo ver danê. Qetilbîyayîşê Jîna ra dima kuçeyî reyna bîyê warê xoverdayîşî û bi sloganê hereketê cinîyanê Kurdan ê ‘cinî, cuye, azadî’ no xoverdayîş xo rasna pêro dinya. Îran, waştişanê komelî ra û nê xoverdayîşî ra terseno, kuçeyan çarneno gola gonî û ciwanan îdam keno. Muhsîn Şikarî yo 23 serrî protesyoyan ver 8ê Kanûne 2022yî de ame îdamkerdiş. Hetê hêzanê rejîmî ra her roje çalakwanî yenê girewtene û îdam kerdene.”
‘Wa îdamî bêrê vindarnayîş’
Peynîya malûmatî de ame vatiş ke, “Kurdî, Farisî, Ecemî, Lurî, Belucî û nasnameyê bindestê bînî xoverdayîşê xo yê heqanê merdiman, azadî û demokrasîyî de heqdar ê û Komara Îslamî ya Îranî ya faşiste vera merdimîye sûc kena. Ma Cinîyê Kurdistanê Bakurî, xoverdayîşê Îran û Rojhelatî heq û meşrû vînenê û reyna vanê ke ma hetê xoverdayoxan de yê. Seba ke îdamî bêrê vindarnayîş û waştişî bêrê qebulkerdiş ganî veng bêro berzkerdiş. Ma soz danê ke, ma do sloganê ‘Cinî, Cuye, Azadî’ bikerê nîşaneyê azadîya cinîyan.”
MA / DÎYARBEKIR
parvê bike
Nûçeyên ku dikare bala we bikşîne
