Turkdogan: Ma do parlamento de bi hayawêkê xurtî cabigerê

Hemserekê Komeleya Heqanê Merdiman (ÎHD) û namzetê Stenbolî yê Partîya Çep a Keske ra Ozturk Turkdoganî weçînayîşî ser o ANFyî rê tayê ercanîşî kerdî.

Namzetê Stenbolî yê Partîya Çep a Keske Ozturk Turkdoganî rewşa weçînayîşî ser o qisey kerd û wina vat: “Eke ma biwazê ferasetê înkarkerdişê şarî biqedînê û heqanê bingeyînan bivisnê destî ganî sey Partîya Çep a Keske parlamento de bi hawayêkê xurtî cabigêrê.”

Turkdoganê huqûqnasî vist vîrî ke 24ê temmuza 2015î qedîyayîşê prosesê çareserîye ra nata şer û pêkewtişî bêmabên dewam kenê coka krîzo ekonomîk qewimîyeno. Turkdoganî vat: “Mi vat ke hînî ez tecrubeyanê xo yê warê heqanê merdiman sîyaset de bişuxilna. Ma do tewirê xo yê dîyarî parlamento de derheqê binpaykerdişê heqanê merdiman de bimojnê. Ez tewr zaf wazena ke prosesêkê çareserîye yo newe dest pêbikero.”

Turkdoganî bale ante ser ke Meydanê Galatasarayî Mayanê Şemeyî rê qedexe yo û na bire kêfî ya. Turkdoganî vat: “Heqê çalakîkerdişî heqo tewr bingeyî yo. Mehkemeya Qanûnê Bingeyî zî bire daye ke no qedexe binpaykerdişê heqî yo la reyna zî qedexe dewam keno. Ma nê rejîmê otorîterî qetî do bişawê. Ez pê bawer a ke 14ê gulane ra dima roja şemeyî ma Galatasaray de çalakîya xo rê dewam bikerê.”

Turkdoganî ard ziwan ke hêzê înan ê vurnayîşî pêt o û vat: “Pêro partîyî qala Qanûnê Bingeyî yê demokratîkî kenê. Eke ma biwazê ferasetê înkarkerdişê şarî biqedînê û heqanê bingeyînan bivisnê destî ganî sey Partîya Çep a Keske parlamento de bi hawayêkê xurtî cabigêrê. Seba ke Partîya Çep a Keske bibo temînato qanûnî yê heqanê bingeyînan bi hawayêkê xurtî parlamento de cabigêra. Îtîfaqê Miletî teyna qala restorasyonî keno. La restorasyon bes nîyo. Partîya Çep a Keske do bi komêka xurte ya parlamentoyî cuya azade, ekolojî, pawitişê xoza û komelê demokratîkî awan bikera. Ma hêvî kenê ke şarê ma yê Stenbolî goreyê ney tercîhê xo bikerê.”

ANF