Walîtîya Mêrdînî kayê Kurdkîyî qedexe kerd

Walîtîya Mêrdînî kayê Tîyatroya Bajarî ya Amedî yê Tartuffeyî asteng kerd.

Kayê tîyatroyî Yay Grand Hotelî yê Mêrdînî de do biameyêne temaşekerdiş la Walîtî nêverda kay bêro kaykerdene.  Walîtî malûmatê xo de va ma qerar girewto ke qasê 15 rojan bajar de çalakîyî ameyê betalkerdiş. Koma tîyatro zî naye ser ra kayê xo betal kerd. Organîzetoran va ma seba destûran îzaat da Walîtî la înan seba tedbîranê koronayî destûr nêda. Ma waşt taloq bierzî la na rey otel nêwaşt û înan va ma nêwazenê Walîtî de bikewê mîyanê şerêk. 

Mudaxele raştaraşt verba kulturê Kurdan o

Organîzatoran naye ser ra malûmatêk da û va; “ma vînenê ke no mudaxele raştaraşt ziwan û kulturê Kurdan rê beno. Serranê peyênan de ziwanê Kurdkîyî ser de tehdayî zêdîyenê. Na zî bîye yewna tehda. Her roje ziwananê bînan de bernameyî benê la dore ke ameye Kurdkî xo rê mehneyan peyda kenê û bi qedexeyan verê nînan genê.”

MÊRDÎN