- Hetê Meclîsa Ciwanan a HDPyî ra Hetay de ‘Warê Kayî yê Ugur Kaymazî’ ame ronayene.
Meclîsa Ciwanan a HDPyî, tedeyîya kampanyaya ‘Rêzila Cuye’ de qezaya Defneyî ya Hetayî de ‘Warê Kayî yê Ugur Kaymazî’ rona. Warê kayî mehlaya Çekmece de ame ronayene. Tîya de çalakîyê sey muzîk, drama û resimî yenê kerdene û ciwanî kenê ke domanan travmaya erdlerze ra dûrî bifînê.
Resim, drama û kayî
Meclîsa Wendekaran a Demokratîkî ra Fatma Çabûke dîyar kerd ke, erdlerze domanan ser o bandorê giranî kerdê û va, “Seba ke verê nê tehrîbatan bêrê girewtene, ma ‘Warê Kayî yê Ugur Kaymazî’ rona. Bi muzîk, kargehanê drama, bi resim û kayan ma do hetê domanan de bê.”
‘Qisewetê keyeyan bandorê domanan kenê’
Endamê Meclîsa Ciwanan û wendekrarê beşê averşîyayîşê domanan Mehmet Çalî dîyar kerd ke, qisewetê keyeyan bandorê domanan kenê û va, “Waştişê domanan seba ma esas ê. Goreyê vînayîşanê ma, polîsî û çekdarê ke derûdorî de yê travmayê domanan zêdînenê. Domanî eşkenê warê kayî de travmayan ra bixelisîyê. Ma do paştî bidê domanan û ma do seba ke ê travmayan ra bixelisîyê bigurîyê.”
Ganî pisporê ke erebkî zanê bêrê
Çalî peynî de bale ante ziwanê dayîke ser û va,”Domanê mintiqa kurdkî û erebkî qisey kenê. Enbazê ke kurdkî qisey kenê estê. Ma gazîye kenê ke, psîkolog û warê pîkolojîyî de pisporê ke erebkî zanê wa paştî bidê ma.”
MA / HETAY