‘Wazenê Geverî bikerê mintiqaya tampone’

• Wekîlê HDPyî Saîd Dedeyî va, “Wazenê Kurdistanî bikerê wareyê şerî û mintiqaya tampone awan bikerê.”

Wekîlê HDPyî Saîd Dedeyî va, “Wazenê Kurdistanî bikerê wareyê şerî û mintiqaya tampone awan bikerê.” 

Tirkîya demêk ra nat Zap, Metîna û Avaşîn de hêrîşanê xo ramnena. Dewê Şirnex û Colemêrgî zî gêrîyayê bine ablûkayî. Tewr peynî mintiqaya Astenga Reşe ya Geverî de operasyon amebi kerdene, dewijî raştê îşkenceyan ameybî. Wekîlê HDPyî yê Colemêrgî Seîd Dedeyî derheqê rewşe de qisey kerd.

‘Şerê înan vera Kurdan o’ 

Wekîl Seîd Dedeyî va, “Tarîxê cumhûrîyetî de Kurdî tim raştê îmhayan, înkaran û asîmîlasyonan ameyê. Dewlete 6-7 serran ra nat rojhelatê mîyanenî polîtîkayanê cîyayan ramnena. Wazenê Kurdan bêstatû verdê û Kurdistanî biruçiknê. Vera pêro Kurdan şerêk yeno kerdene. Kam ke menfaatê şarê xo mefikiro do sey îxanetkarî bêro zanayene. Ganî şarê Başûrî vera operasyonan vengê xo vejê. Wazenê Kurdistanî îşxal bikerê, ganî pêro Kurdî vera nê polîtîkayan vinderê.”

Netîceya tecrîdî: Krîz, Kaos, Şer 

Derheqê tecrîdî de Seîd Dedeyî va, “Key ke tecrît kewto kar, vera Kurdan tehda, zulim û polîtîkayê şerî zêdîyayê. Birêz Ocalan aktorê bingehinî yê sîstemêkî demokratîkî bi. Birêz Ocalan ke dîya kişte, şer hîna bi vila. Operasyonê Başûrî, hêrîşê Rojavayî û têgêrayîşê înan yê vera Kurdan girêdayîyê yewbînî yê. Nê pêroyî bi destê AKPyî yenê kerdene.”

‘Wazenê dewan veng bikerê’ 

Dedeyî va, “Dewê sînorî û dewijî raştê tehdayan yenê. Wazenê dewan veng bikerê, Kurdistanî bikerê wareyê şerî û mintiqaya tampone awane bikerê. La Kurdî do binmekewê. Tena çareyêk esto, ganî Birêz Ocelanî de pêvînayîşêk bibê û muzakereyî dest pêbikerê.”

‘Ganî her kes vera hêrîşan vengê xo berz bikero’ 

Wekîlê HDPyî yê Colemêrgî Seîd Dedeyî tewr peynîye de va, “Ganî kes bêhêvî mebo. Zulmî, tehdayî, hêrîşî benê la destvisteyê ma zî estê. hinî rojhelato mîyanên de bê Kurdan çîyêk safî nêbeno. Sîyasetê Tirkîya de zî wina yo. Coka wa kes hêvîya xo mebirno. Ganî her kes vera hêrîşan vengê xo berz bikero.”

MA / COLEMÊRG