Xelata hurmetî dîyaya Şehram Nazerîyî

• Wezaretîya Kulturî ya Kurdistanê Başûrî xelata hurmetî daye Şehram Nazerîyî.

Wezaretîya Kulturî ya Kurdistanê Başûrî xelata hurmetî daye Şehram Nazerîyî.

Şehram Nazerî muzîsyenêko westa û namdar o. Nazerî hunermendîya xo ya serkewtîye ver heta ewro xeylê xelatî girewtê. Narey zî Wezaretîya Kulturî ya Kurdistanê Başûrî xelata hurmetî daya ey. Şehram Nazerî vato, “Mi xeylê welatan ra xeylê xelatî girewtê la na xelata welatê mi seba mi zaf qîmetin a.” Merasîmê xelate Hewlêr de Eywana Qazî Mihemedî de virazîya. Xelatdayîşî ra dima derheqê hunermendî de belgefîlmêk ameye ramojnayene. Şehram Nazerîyî va, “Ez sey hunermendêkî Kurdî wazena muzîkê Kurdkî birasnî her cayê dinya. Mi zaf cayan ra xelatî girewtê la yewe zî qasê na xelata welatî qîmetine nîya.”

Derheqê Şehram Nazerîyî de

Şehram Nazerî 1949î de Kirmanşah de keyeyêko hunermendî de ameyo dinya. Domantîya xo de dest bi muzîkî kerdo. 40î ra zêder albumê ey estê. Mîyanê hunermendanê Kurdan de wayîrê cayêkî muhîmî yo. 2012î de bi Orkestraya Gomîtasî reyde deyîrê Kurdkî yê klasîkî vatê. Nazerî mîyanê tradîsyonêkî ra ameyo. Westayanê pîlan ra dersî girewtê. Şehram Nazerîyî deyîrê xo festîvalanê zaf pîlan de vatê. 2014î de Kirmanşah de deyîra ‘Min Kirmanşan im, Farsî nêzanim’î vate û bi ‘Miletperwerîye’ ame îthamkerdiş. Nazerî tena seba muzîkê Kurdkî ney seba muzîkê dinyaye zî hunermendêko zaf muhîm o. Hunermendo pîl hunerê xo dayo lajê xo zî. Hafez Nazerî lajê Şehramî yo û raşta zî muzîsyenêko serkewte yo. 

NÛPEL / HEWLÊR