Zebarî: Komîsyon delîlanê kîmyewîyan peyda bikero, do rejîmê Erdoganî bişikîyo

• Akademîsyen Dr. Hoşyar Zebarîyî dîyar kerd ke, komîsyono ke seba cigêrarayîşan ameyo awankerdiş zaf muhîm o.

Parlamentoya Iraqî 16ê Teşrîna Peyêne de gamêka muhîme eşte. Seba ke hêrîşê kîmyewîyî yê Tirkîya ser o cigêrayîşî bibê, komîsyonêk ame ronayene. Komîsyonî de endamê Wezaretîya Sihetî, endamê wezaretîyê karanê teberi û endamê komîsyonê pawitişî ca genê. Komîsyon do derheqê kîmyewîyan de delil û belgeyan arê bido û Konseyê Ewleyîye yê Neteweyanê Yewbîyayîyan rê gerre bikero.

Akademîsyen Dr. Hoşyar Zebarîyî derheqê muhîmîya ronayîşê komîsyonî de û derheqê hêrîşanê Tirkîya de erjnayîşî kerdê.

‘Gamêka zaf muhîm a’

Dr. Hoşyar Zebarîyî va, “7 aşmî ra nat artêşê îşxalkarê Tirkan vera mintiqa hem hewa ra hem erdî ra hêrîşan keno. Bitaybetî Zap û Metîna de şerêko giran esto. Bi pêro îmkananê xo eskerê Tirkan nêeşka aver de şêro û darbanê giranan geno. Coka aşma Temûze ra nat çekanê kîmyewîyan ê qedexeyan gurînenê. Nê çekî hîna zêde Zap û Metîna de yenê gurînayîş. Heta Şêladizê û nêzdîyê Amûdeyî de zî nê çekî ameyê gurînayîş. Hetê HPGyî ra delil û ispatî ameyê parekerdiş. Bi nê belgeyan gurînayîşê kîmyewîyan reyna ame tespîtkerdiş. Hêverî Parlamentoya Îngîltereyî de hêrîşê kîmyewîyî ameyê rexnekerdiş û gazîye ameye kerdene ke hêrîşê Tirkîya bêrê vindertene.”

Têgêrayîşê Hukmatê Kurdistanî

Zebarîyî va, “Na game ramojnena ke, Parlamentoya Iraqî na meseleye cidî gena. Cigêrayîşî û seba cigêrayîşan şîyayîşê heyetan zaf muhîm o. Gelo Hukmatê Kurdistanê Başûrî do paştî bido nê komîsyonî yan medo? Do destûr bidîyo nê heyetan ke ê şorê mintiqa de cigêrayîşan bikerê yan medê? Eke Hukmatê Başûrî paştî bidon ê komîsyonî, do delîlê pîlî bêrê peydakerdiş. Eke destûr medo, şerîkîya înan û Tirkîya do reyna eşkera biba.”

‘Seba şikîyayîşê rejîmê Erdoganî belgeyêk’

Zebarîyî peynî de va, “Hukmatê Iraqî newe ronîya. Hukmatî dîyar kerdo ke do hêrîşanê Tirkîya ser o têbigêro. Hetêk ra Îran de protestoyî estê. Îran wazeno meseleyanê zereyî bido teber. Hêzê Kurdî hetê Îranî ra her roje yenê bombakerdiş. Mabênê Tirkîya û Îranî de pêkerdişêk esto. Tirkîya ewro tena Başûrê Kurdistanî ney, wazena Rojavayê Kurdistanî îşxal bikera. Tirkîya vera Kurdan operasyonê qirkerdişî da dest pêkerdiş. Na rewşe zaf xirab a. Eke komîsyon o ke ameyo ronayene cigêrayîşanê xo bi cidî bikero, do netîceyî bêrê girewtene. Eke delil û belgeyi bikewê destê nê komîsyonî, beno ke hêrîşê Erdoganî yê Başûr û Rojavayî bidîyê vindertene. No do seba şikîyayîşê rejîmê Erdoganî bibo belgeyêko muhîm.”

MERKEZÊ XEBERAN