Ozdemîr: Xoverdayîş netîce girewte

Rojnameger Merwan Ozdemîrî dîyar kerd ke, Parlamentoya Iraqî de awankerdişê komîsyonî yeno vateyê qebulkerdişê gurînayîşê kîmyewîyan.

Parlamentoya Iraqî seba cigêrayîşê çekanê kîmyewîyan ê hetê Tirkîya ra vera mintiqayanê Zap, Metîna û Avaşînî yenê gurînayîş, komîsyonêko taybet awan kerd. Komîsyon do şêro mintiqayanê ke operasyonê Tirkîya dewam kenê û nê cayan de cigêrayîşan bikero. Rojnameger Merwan Ozdemîrî derheqê komîsyonî de Ajansê Mezopotamyayî rê qisey kerd.

Rojnameger Merwan Ozdemîrî va, “Hêrîşê dewleta tirke yê vera Başûrê Kurdistanî nîmeyê nîsane ra dima zêdîyayê û hîra bîyê. Xeylê malûmatî ameyê dayene ke nê hêrîşan de çeke kîmyewîyî yenê gurînayîş. La çi heyf ke na babete çîyêk nêame kerdene. Coka dewleta tirke hîna zêde kîmyewîyî gurînayê. Çi heyf o ke dîmenê ke do çirey vîrê şarê kurdî ra nêşorê ra dima, bîyê rojane. HPGyî nê 2 serran de xeylê reyan gazîya cigêrayîşanê çekanê kîmyewîyan kerde. Çend sazîyan cewab da nê gazîyan û ameyê mintiqa la PDKyî destûr nêda ke nê sazîyan mintiqa de cigêrayîşan bikerê.”

Xoverdayîş netîce girewta

Ozdemîrî dîyar kerd ke awankerdişê komîsyonî netîceya xoverdayîşî ya û va, “Hetê Kurdan ra na bêexlaqîye û na bêwijdanîye nêameyê qebulkerdiş. Parlamentoya Iraqî qerarê awankerdişê komîsyonî da. Beno ke bandorê hukmatê neweyî bo. La ganî bêro zanayene ke awankerdişê komîsyonî, netîceya xoverdayîşê şarê Kurdî ya. Beno ke komîsyon ameyo awankerdiş la ganî sazî û kesayetê mîmannetewîyî nê qerarî ver xo sist mekerê.”

Ganî roşnvîrî teqîb bikerê

Peynîya qiseykerdişê xo de Ozdemîrî va, “Seserra winasîye ya ke tede tarîx, kultur û nasnameyî yenê binpaykerdiş, ma ganî mepawê ke do no komîsyon bi hesasîyetêk raştîyan teqîb bikero. Komel, sazî, rêxistinê xoserî û roşnvîrê ke rêça heqîqetan ra şonê, bedelê c içi beno wa bibo, ganî nê komîsyonî teqîb bikerê. wexto ke menfeatî bikewê kar, meseleyî beno ke birasê yewna ca. Awankerdişê komîsyonî, qebulkerdişê ‘îddîayê’ gurînayîşê çekanê kîmyewîyan o. Eşkera yo ke çekê kîmyewîyî yenê gurînayîş. Ganî sazîyê têkildarî, roşnvîrî û zanyarê ke pisporê babete yê komîsyonî teqîb bikerê û tede ca bigerê.”

XWEBÛN