KON-MED: Ganî vera sûcanê şerî xeta xoverdayîşî bêra awankerdene

• Hemsereka KON-MEDî Zebeyde Zumrute bêvengîya Ewrûpayî rexne kerd û va, “Ganî vera sûcanê şerî yê AKPyî xeta xoverdayîşî bêra awankerdene.”

KCDK-Eyî, vera hêrîşanê kîmyewîyan ê Tirkîya bi beşdarîya bi hezaran kesan 12ê Teşrîna Peyêne de Dusseldorfî de rayîrşîyayîşêk organîze kerd. Nar oje hetê KCDK-Eyî ra sey Vera Kîmyewîyan Roja Greva Neteweyî ameye îlankerdene. Rayîrşîyayîş de gurînayîşê çekanê kîmyewîyan ame protestokerdiş. Bêvengîya OPCWyî, NYyî û NATOyî ameye rexnekerdiş. Hemsereka KON-MEDî Zubeyde Zumrute mesajanê rayîrşîyayîşî û begangîya Ewrûpayî erjnayê.

Sûcê merdimîye

Zubeyde Zumrute va, “Hêrîşanê Tirkîya de xeylê belgeyî estê ke kîmyewîyî ameyê gurînayîş. Gurînayîşê kîmyewîyan sûcê şer û merdimîye yo. Muqaveleyanê qedexekerdişê kîmyewîyan de îmzaya Tirkîya zî esta la bêvengîya Ewrûpayî hema zî dewam kena. Cûwaver kîmyewîyî Dêrsim de, Gêlîyê Tîyarê de ameyê gurînayîş. Ma Helebçeyî xo vîr ra nêkenê. Ewro Zap, Metîna û Avaşîn de gurînayîşê kîmyewîyan yeno vateyê qirkerdişê Kurdan ê neweyî. Coka vera kîmyewîyan têgêrayîşê Kurdan û dostane ci çend şêro zêdîyenê.”

‘Vera sûcanê şerî xoverdayîş’

Zumrute va, “Derheqê gurînayîşê kîmyewîyan de belge û dosyayî ameyê teslîmkerdiş la Ewrûpara û sazîyanê têkildaran ra veng nêjejîyeno. Ganî cade na bêvengîye biqedîya û her kes vera sûcanê merdimîye têbigêro. Vera sûcanê şerî yê AKPyî ganî xeta xoverdayîşî bêra awankerdene. Ganî pêro şarî berpirsîyayîye bigerê xo ser.”

‘Ewrûpa hêrîşan rê çimanê xo gêno’

Zumrute peynî de va, “Ewrûpa vera hêrîşan çimanê xo gêno. Tewr peynî înan vato ‘Destê ma de delîlî çin ê, nê îtîrazî bi goreyê çi benê’. Dîmenanê verînan de zî, yê peyênan de zî delîlî eşkera yê. Eke delîlê hîna eşkerayî yenê waştene, wa heyetê xoserî şorê mintiqa û wa cigêrayîşan bikerê. Nê cigêrayîşî hetêk ra bi destê Ewrûpayî ra hetêk ra bi destê PDKyî ra yenê astengkerdiş. Ganî hetê heyetanê xoseran ra cigêrayîşî bibê û netîceyî zî raya pêpoyîye reyde bêrê parakerdene. Çi heyf ke mesele Kurdî bê, her kes beno lal û ker û kor.”

MERKEZÊ XEBERAN