12ê Êlule de do çalakîyê hemwextî yê ziwanê dayîke bêrê viraştene

• Hemverfekê Komîsyonê Ziwan, Kultur û Hunerî yê HDPyî Omer Ocalanî va, “Vera asîmîlasyonî ma do vajê ‘Ma perwerdeyê ziwanê dayîke wazenê’.”

BÊRÎVAN ALTAN / MA / ENQERA

Hetê HDPyî ra do vera asîmîlasyonê ziwanî 12ê Êlule de xeylê cayan de çalakîyê hemwextî bêrê viraştene. Çalakîyî do bi rayberîya Komîsyonê Polîtîkayanê Perwerdeyî û Komîsyonê Ziwan, Kultur û Hunerî yê HDPyî ra, Dîyarbekir, Wan, Gever, Cizîr, Mêrdîn, Riha, Êlih, Çewlîg, Dêrsim, Izmîr, Edene û Mersînî de bêrê viraştene. 

Neteweyêk bi ziwanî beno netewe

Hemverfekê Komîsyonê Ziwan, Kultur û Hunerî yê HDPyî Omer Ocalanî va, “Neteweyêk bi ziwanî beno netewe. Bingeyê neteweyan û têkilîyanê komelkîyan de ziwan esto. Ziwan şexsîyetê merdiman awan keno. Tirkîya de perwerde bi Tirkî yeno dayene. Bi Fransizkî, Almankî û Îngîlîzkî zî perwerde yeno dayene la bimîlyonî Kurdî nêşkenê bi ziwanê xo perwerde bigerê. Tirkîya de tim kede ameya dayîş ke Kurdkî vîndî biba. Ewro Kurdî bîyê hişyar û wayîrê ziwan û kulturê xo vejîyenê la cûwa ver Kurdkî sey ziwanî nêameya vînayene û ameya qedexekerdiş. Kurdan vera nê polîtîkayan xo ver da. Ganî Kurdkî sey ziwanêko resmî bêra qebulkerdiş û ziwanê dayîke de perwerde bêro dayene. Eke nîya nêbo, çerxê asîmîlasyonî gêreno û ziwan zirar vîneno.”

Ganî perwerdeyo akademik bêro dayene

Ocalanî va, “Nameyê, nasnameyê û ziwanê Kurdan nîno qebulkerdiş. Tena wextê weçînitişan de çend qiseyî yenê kerdene. Ganî no bêro famkerdiş. Ziwan raştê asîmîlasyonî yeno, raştê tehdayan yeno dima sîyasetmedarî vejîyenê çend çîyanê sembolîkan kenê. Ziwanê Kurdan tena ziwanê deyîran û govende nîyo. Ganî bi Kurdkî perwerdeyo akademik bêro dayene. Seba ke Kurdkî aver de şêra, ganî ziwanê Kurdkî bibo ziwanê perwerdeyî.”

Gazîya xoverdayîşê polîtîkî

Dewamê qiseykerdişê xo de Ocalanî va, “Tayê vejîyenê vanê eleqayê ma yo sîyasetî çin o û ma tena xoverdayîşê ziwanî danê. Çîyêko winasî çin o. No xopapînayîş o. Waştişê perwerdeyê ziwanê dayîke, xora waştişêko polîtîk o. Coka ganî xoverdayîşo polîtîk bêro ramitene. Ewro HDP xoverdayîşêko winasî dano. Ma do seba perwerdeyê ziwanê dayîke xebatanê xo biramnê. Nika ziwanê Kurdkî bi dersa weçînitîye yeno dayene la no bes nîyo. Ganî Kurdkî bibo resmî. Meşte nê dersî zî eşkenê bêrê wedartiş. Heqê her kesî yo ke bi ziwanê xo perwerde bigero.”

‘Ma ganî Kurdkî binusê û biwanê’

Omer Ocalanî peynî de va, “Kurdistan de polîtîkayî senî yenê ramitene, eynî polîtîkayî ziwanî ser de zî yenê ramitene. Ma do 12ê Êlule de xeylê cayan de çalakîyan bivirazê û ma do vera asîmîlasyonî vajê ‘Ma perwerdeyê ziwanê dayîke wazenê’. Ma pêro şarê xo silaynenê çalaki û malaûmatanê xo. Ma do seba averderdişê kultur û ziwanê Kurdkî xebatanê xo biramnê.”