Sazîyanê ziwanî ra eşkerayîye: Wa Kurdkî bibo ziwano fermî û ziwanê perwerdeyî

Dewrê perwerdeyî ewro dest pêkerd û sazîyanê ziwanî Amed, Êlih û Şirnexî de bi waştişê perwedeyê ziwanê dayîke eşkerayîye ameye dayene.

Amed de rayberîya MED-DERî de Parqa Koşûyolûyî de eşkerayîye ameye dayene. Endamê xeylê komele û sazîyan bîyê beşdarê eşkerayîye. Verê eşkerayîye Hemserekê MED-DERî Rifat Ronîyî bale ante muhîmîya perwerdeyê ziwanê dayîke û dîyar kerd ke vera xoverdayîşê înan do dewam bikero.

‘Wa Kurdkî bibo ziwanê perwerdeyî’

Metnê eşkerayîye hetê îderakara MED-DERî Dîlan Guvençe ra ame wendene û ame vatiş ke, “Qanûnê 42inî yê Qanûnê Bingeyî yê Tirkîya de yeno vatene ke mektebanê dewlete de bê Tirkî yewba ziwanî de perwerde nîno dayene. Reyna do sey se serra Komara Tirkîya do domananê Kurdan rê perwerdeyo Kurdkî bêro ferzkerdiş û domanê Kurdî do ziwanê dayîke ra mehrûm bimanê. Domanê Kurdî do heqîqet, nasname û kulturê xo ra dûrî bimanê. Kurdî wazenê ziwanê xo, kulturê xo û erjanê xo yê neteweyîyan bipawê û seba ney xo ver danê. Kurdî wazenê wa Kurdî bibo ziwanê resmî û wextê verwendegehî ra heta zaningeh bibo ziwanê perwerdeyî. No waştişêko meşrû û merdimî yo.”

Perwerdeyê ziwanê dayîke heqêko bingeyî yo

Dewamê eşkerayîye de ame vatiş ke, “Pêkerdişê ke heqê ziwanî ser o bîyê seba Kurdan zî derbasdar ê. UNESCO no derheq de vano; seba ke domanî hîna baş bimusê û fam bikerê ganî bi ziwanê xo dest bi perwerdeyî bikerê. Sewbîna zî ziwannasî û pisporê perwerdeyî vanê domanî destpêkê perwerdeyî de eşkenê eynî wext de çend ziwanan bimusê. Domanê Kurdî wazenê ziwanê xo de perwerde bigerê, biwanê û binusê. No heqê pêro domanan û heqê domananê Kurdan o. Ganî vera polîtîkayanê asîmîlasyonî her kes vengê xo berz bikero. Ganî verwendegehî ra heta zzaningeh Kurdkî bibo ziwanê perwerdeyî. Kurdî do timûtim seba ziwanê xo xoverdayîşê xo biramnê.”

Cizîr de rayberîya Komeleya Birca Beleke de û Êlih de zî rayberîya ARÎ-DERî de bi waştişê perwerdeyê ziwanê dayîke eşkerayîyê ameyê dayene.

MERKEZÊ XEBERAN