MA / Fethî BALABAN / ÊLIH
ARÎ-DER o ke Êlih de xebatanê xo ramneno, emser do kargeha mamostetîye ra 30 kesan mezûn bikero.
Kursê Kurdkî yê ARÎ-DERî Êlih de dewam kenê. Komele, 4 serrî ra nat xebatanê xo ramnena û xeylê wendekarî bîyê beşdarê kursanê ci. Komeleye de 5 kargehî estê û nînan ra yew zî kargeha ziwanî ya. Îdarekaranê komeleye Nuh Bozkur û Hava Cane derheqê xebatanê komelede de qisey kerd.
30 kesî do bibê mamosta
Bozkurî dîyar kerd ke komeleye de hetê 10 mamosteyan ra perwerde yeno dayene û va, “Asta yewine ra heta asta 3yine kursî dewam kenê. Nika zî ma do seba mamostatîye kargehe akerê. Ma emser kargeha Îngîlîzkî zî akerde. Mabenê serranê 25-30î de wendekarî estê. Xeylê karan ra wendekarî estê. Tayê wendekarî dewan ra û qezayan ra yenê. Emser seba ma serrêka hîna muhîm a. Sinifa asta mamostatîye de 30 wendekarê ma estê. 9 aşman ra dima do 30 mamostayê ma kargehe ra mezûn bibê.”
Hava Cane, 3 astî perwerde girewt, asma mamostatîye zî qedînaye û nika komele de sey îdarekare ca gena. Wayîrê 6 domanan a û dîyar kerd ke keye de bi Kurdkî qiaey kenê û binge keye de dest pêkeno. Cane va, “Ma dayîkî ganî hem Kurdkî qisey bikerê hem zî bimusnê domanan. Ma ganî her warê cuye de ziwanê xo bigurînê. Derheqê ziwanî de rolê cinîyan zaf muhîm o. Ganî her cinî ney bizana û xo aver de bera.”
‘Her kes berpirsîyar o’
Cane dîyar kerd ke ê xebatanê xo tena mabênê dêsan de nêkenê û va, “Ma parkan de, mehlayan de domanan reyde yenê têhet. Ma çalakîyan organîze kenê. Man ê çalakîyan de behsê muhîmîya ziwanî kenê. Kurdkî raşta zî ziwanêko zaf dewlemend o. Her kes berpirsîyar o ke ganî ziwanî xo de qisey bikero, ziwanê xo bimuso û bimusno.”
parvê bike
Nûçeyên ku dikare bala we bikşîne
