Aktorê sîyasî yê ke Kurdan qebul mekerê nêşkenê serbikewê

• Hakan Tahmaz: Sîyasîyî waştişê Kurdan ê bi nasnameyê xo cuyayîşî qebul mekerê nêşkenê demokrasîyî awan bikerê.

Ronayîşê Cumhûrîyetî ra nat, meseleya Kurdan de polîtîkayê înkar û redkerdişî dewam kenê. Polîtîkayanê şerî ver krîzê sîyasî û ekonomîkî giran bîyê. Îqtîdarê AKPyî de nê meseleyi hîna giran bîyê.

Verê weçînitişî derheqê HDPyî de dewaya padayîşî ameye akerdene û hesabê ci ameyê blokekerdiş. Serekê Pêroyî yê Weqfa Haştîye Hakan Tahmazî derheqê polîtîkayanê şerî û vera Kurdan têgêrayîşanê muxalefetî ser o erjnayîşî kerdê.

Kurdî çira hedef gêrîyenê?

Tahmazî dîyar kerd ke, Cûmhûrîyetî ra nat polîtîkayê şerî Kurdan ser ra yenê ramitene û va, “Şer Kurdan ser ra yeno ramitene çunke; Kurdan bieşkera vera îdeolojîyê ronayîşî xo ver da. Coka dewlete sere de Rojhelato Mîyanên de û pêro dinya de wazena verê Kurdan bigera. Tek çareyê vindarnayîşê nê şerî sîyaseto demokratîk o. Felsefeyê dewlete dewlemendîyan û Kurdan xo rê tehtîd vîneno.”

Ganî rayîrê haştîye bêro akerdene

Tahmazî dîyar kerd ke, Kurdî ganî bi nasnameyê xo, kulturê xo û ziwanê xo bieşkê bicuwîyê û dewlete zî ganî kodanê xo bivurîna. Tahmazî muxalefetî hişyar kerd û va, “Heta muxalefet xo raşt mekero, polîtîkayê şerî do dewam bikerê. Kurdî ganî bibê wayîrê heqanê xo. Îqtîdar ganî Kurdan reyde bikewo rayîrê haştîye. Ganî aktoranê sîyasîyan de dîalogî bêrê ronayîş.”

Tahmazî derheqê weçînitişê 2023yî de dîyar kerd ke, no weçînitiş zaf krîtîk û muhîm o û va, “Bê HDPyî weçînitîşî de îmkanê serkewtişî çin o.”

Tahmazî peynî de dîyar kerd, seba ke meseleya Kurdan bi rayanê haştîye çareser biba, ganî muxalefet çêr bo û va, “Ganî îqtîdar komelî ra vajo ke no rayîro raşt o û ganî muxalefet bizano ke testê çêrîye ra vîyareno.”

MA / ÎSTANBÛL