Apê Mûsa ame yadkerdene: Generalê to yê qijkekî do qelema to bikirişnê

Zanyarê Kurdan Apê Mûsa, Amed de herinda ke amebi qetilkerdişî de ame yadkerdene.

Zanyarê Kurdan, rojnameger û nuştoş Mûsa Anter (Apê Mûsa), 20ê Êlule 1992î de Amed de Mehlaya Cumhûrîyetî kuçeyê 442inî de hetê JÎTEMî ra ame qetilkerdiş. Apê Mûsa, herinda ke ame qetilkerdişî de ame yadkerdene. Yadkerdene hetê DFG û MKGPyî ra ameye organîzekerdiş. Lajê Apê Mûsayî Dîcle Anter, parlamenterê Partîya çep a Keske, rojnamegerî, temsîlkarê partî û sazîyan bîyê beşdarê yadkerdişî.

‘Ma do çirey qelema ey cameverdê’

Payravindertişê hurmetî ra dima hêverî Verfeka MKGPyî Roza Metîna qisey kerd û va, “Ma bi hurmetî verê ey de xo çewt kenê. Xeylê tedayî dîyê la rojnamegerîye terk nêkerde. Apê Mûsayî seba qelema xo xoverdayîşêko pîl da. Qelema ey do timûtim destê ma de ma û ma do çirey qelema ey cameverdê. Ma do timûtim wayîrê mîrasê ci bivejîyê. Dewlete, polîtîkaya bêcezaverdişî ramanena. Faîlê Apê Mûsayî bêceza mendê. Ma do na polîtîka timûtim teşhîr bikerê.”

‘Ma beyraqa ey hîna kenê berze’

Rojnameger Huseyîn Aykolî yadkerdişî de qisey kerd û va, “Birêz Apê Mûsa, mi par zî tîya de rapor dabi to. Qetilbîyayîşê to ra heta ewro ma rojnameyî vetê, televîzyonê ma bîyê. Înan ke ti qetil kerdî va beno ke ma fekraverdê la ma canêverda. Ma beyraqa to kirişte. Ma kewtê xeberanê raştan dima. Embazê ma reyna bêhiqûqî yenê girewtene. Mîyanê serrêke de 30 ra zêderî embazê ma ameyê girewtene. La embazê ma zere de zî teber de zî karê xo kenê. Ma sozê xo anê ca û ma beyraqa to ya ke to daya ma hîna kenê berze. Ma do ameyoxî de zî tîya de bê. Ma tîya de yê, dewam kenê û ma do dewam bikerê zî.”

‘Generalê to qelema to kirişnenê’

Lajê Apê Mûsayî Dîcle Anterî wesîyetê pîyê xo ard vîrî û va, “Yew vateyê pîyê mi estibi, wesîyetê ci wina yo; ‘Wa ciwanî Kurdî nîya têbigêrê ke ez mezela xo de rehet rakewî.’ Qelema ey ameye şikitiş la generalanê Apê Mûsayî qelema ey temîr kerde û înan dewam kerd. A qeleme do çirey meşikîya. Xeylê rojnamegerê cefakarî niştê gilanê na çinarêre ro. Rehet rakewe bawo, çunke generalê to yê qijkekî qelema to kirişenê.”

‘Ma do çirey xo vîrî ra mekerê’

Parlamenterê Partîya Çep a Keske yê Amedî Mehmet Kamaçî va, “31 serrî verî cû Apê Mûsa tîya de ame qetilkerdiş. La ma zanê ke par hetê hiqûqî ra reyna ame qetilkerdiş. Faîlê Apê Mûsayî bêceza mendê. Ma do çirey Apê Mûsayî xo vîrî ra mekerê. Apê Mûsa ezman de sey estareyêk çiruskîyeno û xoverdayîşê ma roşn keno. Rayîrê ey rayîrê xoverdayîşî yo.”

Qiseykerdişan ra dima girse bi slogananê ‘Vengê çapemenîya azade nîno birnayene’ û ‘Şehîdî nêmirenê’ ver bi herinda qetilkerdişî rayra şîyê. Tîya de, bi ronayîşanê qerenfîlan yadkerdiş qedîya. 

MA / AMED