Aydenîze: Ma wayîrê Kobanî vejîyayê û ma do bi eynî ruhî ya wayîrê Rojavayî bivejîyê

Derheqê hêrişanê Tirkîya de Amed de eşkerayîye ameye dayene. Hemsereka Pêroyî ya DBPyî Salîha Aydenîze dîyar kerd ke şarê Bakurî do bêveng mebo.

Derheqê hêrişanê Tirkîya de Amed de hetê xeylê sazî û partîyan ra eşkerayîye ameye dayene. TJA, DBP, Partîya Çep a Keske, MED-TUHAD FEDî awanîya DBPyî de eşkerayîye daye. Partîya Azadîye û Merdimîye (PÎA) û Partîya Komunîst a Kurdistanî zî paştî da eşkerayîye.

Zîhnîyetê Fîdan û Netenyahuyî eynî yo

Hemsereka Pêroyî ya DBPyî Salîha Aydenîze va, “Ferqê nê hêrişan û hêrişanê DAÎŞî çin o. Nê hêrişî sûcê merdimîye yê. Reyna wazenê 100 serrî ya Lozanî de Rojhelatê Mîyanênî goreyê menfeatanê xo dîzayn bikerê. Demêk ra ver Wezîrê Karanê Teberî Hakan Fîdanî va ke ê do sîstemê Rojavayî serûbin bikerê û hêrîşê cuya şarî bikerê. Netenyahuyî zî seba Xezeyî eyn3i çîyî vatê. Pêro dinya vateyê Netenyahuyî rexne kerdê la kes vateyanê Fîdanî rê vengê xo nêkerd. Eke ma biewnê qiseyanê înan ra, ma vînenê ke vateyê eynî zîhnîyetî yê.”

Dewamê qiseyanê xo de Aydenîze va, “Ma gazîye kenê ke; êyê ke vanê ma qet Kurdan sîyaset kenê ganî bêmehneyan destkewteyanê Kurdan bipawê. Ganî bi ruhê yewîtîye heqê Kurdan bêrê pawitene. Ma gayîyêke zî NYyî rê kenê; ten abi rapornuştiş no kar nêbeno. Ganî şima berpirsîyarîya xo biyarê ca. Gazîya ma ya peyêne zî seba sehaya hewayî ya. Ganî Emerîka, Rusya û fransa sehaya hewayî padê. Rojava binê ambargoya girane de yo û ganî na ambargo bêra wedartene. Ma şarê Rojavayî rê sereweşîye wazenê. Rojava de 3 rojî şîne ameye îlankerdene. Ma na şîne sey şîna neteweyîye vînenê. Şarê Bakurî do bêveng memano. Ma bi îradeyo pîl wayîrê Kobanî vejîyayê û ma do bi eynî ruhî ya wayîrê Rojavayî bivejîyê.”

Hiqûqo mîyanneteweyî yeno binpaykerdiş

Verfekê Partîya Komunîst a Kurdistanî Nusrettîn Maçînî zî bala ante vateyanê Fîdanî ser o û va, “No hiqûqo mîyanneteweyî de sûcêko eşkera yo. Wezîrê Karanê Teberî bi eşkera û bi rehetî eşkeno qetlîam û qirkerdişî heq bivîno. No nîno qebulkerdene. Ma hêrişanê dewleta Tirke şermezar kenê.”

Hetkarê Serekê PÎAyî Ahmet Kayayî zî va, “Verî ra nat hiqûq çirey nêameyo na cografya. Înan ke hiqûq kerdo vînceleyê fekê xo w ana bêcidîyetî terk bikerê û nê hêrişan rê vengê xo berz bikerê.”

MA / AMED