Başûr de hewldayîyê herêma tampone

Hemkarîya PDKyî û dewleta tirke dewam kena. Îdareyê Erdoganî Başûrê Kurdistanî de hewl dano ke herêma tampone awan bikero, la PDK bêveng maneno.

Nuştox Pîrdogan Kemal nuseno ke dewleta tirke bi destê PDKyî xîret kena ke Behdînanî ra heta Biradostî herêmêka tampone awan bikero.

ANFyî ra Pîrdogan Kemalî derheqê polîtîkaya dewleta tirke de tayê analîzî kerdî. Kemal wina nuseno: “Dewleta tirke ronîyayîşê xo ra nata armanc kena ke çar parçeyanê Kurdistanî zî îşxal bikera. Rejîmê Baasî yê Sûrîye bi projeyê ‘Kemberê Ereban’ Rojawan de xîret kerd ke şarê kurdî yewbînan ra cîya bikero. Rejîmê Baasî yê Iraqî heman polîtîka vera şarê Başûrî kerde. Vakur de zî bi operasyonanê qirkerdişan kurdî dîyayî koçkerdene.

Cografyaya Kurdistanî sey polîtîkayêka îşxalî binê ablûqaya dewletan de ya. Başûrê Kurdistan de zî bi serran o hetê PDKyî ra hêzê leşkerî yê dewleta tirke ya îşxalkere yenê cakerdene û şarê herême dîyeno koçkerdene.”

Nuşteyê Kemalî de polîtîkaya gemarine ya dewleta tirke ya vera Başûrê Kurdistanî wina yena teswîrkerdene: “Dewleta tirke seba ke qirkerdişê kurdan temam bikera 8 serranê peyênan de hêrişê xo yê îmhakerdişî zêdînayî. Dewleta tirke nika plan kena ke Vakurê Kurdistanî ra heta sînorê Rojhelatê Kurdistanî herêmêka tampone awan bikera. Mabênê nê sînoran de dêsê berzî virazîyayî ke herêma tampone 30 kîlometre şora zereyî. Gerîlayan bi xoverdayîşê xo hêrişê nê planî pûç kerdî la dewleta îşxalkere bi destê PDKyî xo resnena waranê gerîlayan. Nê 3 serranê peyênan de hêzê PDKyî bi xo serkêşîya leşkeranê tirkan kenê û nînan benê waranê gerîlayan. PDKyî seba artêşa tirke bi desan baregehî awan kerdî û şar wareyanê ci ra kerd. Bi taybetî dewê nêzdîyê waranê gerîlayan ameyî hedefkerdene.”

MERKEZÊ XEBERAN