Rojnews: Cuy û ewleyîya edîtorê ma ra PDK mesûldar o

CPJyî dîyar kerd ke derheqê girewtişê rojnameger Suleyman Ahmedî de berpirsîyarî nêwazenê qisey bikerê û Rojnewsî zî dîyar kerd ke cuy û ewleyîya edîtorê înan ra PDK mesûldar o.

Edîtorê Servîsê Erebkî yê Rojnewsî Suleyman Ehmed, Berê Sînorî yê Pêşxabûrî de hetê hÊzanê PDKyî ra amebi girewtene û 9 rojî yo ke cira xebere nîna girewtene. Vîndîbîyayîşê ci ra 6 rojî dima hetê Asayîşê Dihokî ra eşkerayîye ke ameye dayene. Derheqê binçimgirewtişî de çîyêk nêame vatene û hetê înan ra ame îddîakerdiş ke Suleyman Ahmed rojnameger nîyo.

Rojnewsî, na eşkerayîye ra dima dîyar kerd ke cuy û ewleyîya edîtorê înan ra PDK mesûldar o. Ame dîyarkerdiş ke Ahmed 5 serrî yo ajans de edîtorîye keno. Remnayîşê ey ame şermezarkerdene û ame waştiş ke ganî Ahmed cade bêro veradayene.

Serekê Merkezê Heqanê Merdiman ê Iraqî Alî Abadîyî va, “PDK do bi na kerdena xo raştê cipersayîşanê hiqûqî bêro. Derheqê remnayîşê Ahmedî de çîyêk nêameyo vatene. Ganî derheqê rewşa ci de malumatî bêrê dayene û xebere bidîya keyeyê ci.”

CPJ: Ameyo remnayene û rêça ci ameya vîndîkerdene 

Komîteya Pawitişî ya Rojnamegeran (CPJ) zî derheqê remnayîşê Ahmedî de eşkerayîye daye.

Ame vatene ke, “Hemwelatîyê Sûrîyeyî û edîtorê Rojnewsî Suleyman Ahmed, hetê berpirsîyaranê Mintiqaya Kurdistanî ra Berê Sînorî yê Pêşxabûrî ra ameyo remnayene û reça ey ameya vîndîkerdene. Mintiqaya Kurdistanî de rojnamegerî tim raştê tehtîd hêrişan yenê û no nîno qebulkerdene. Hêrişî rasenê heta îşkenceyan û heqî yenê binpaykerdene. Seba ke rojnamegerî bieşkê karê xo bikerê ganî rayîrê înan bêrê akerdene.”

CPJyî dîyar kerd ke înan waşto derheqê remnayîşê Ahmedî de berpirsîyaran ra malumatan bigerê la berpirsîyaran cewab nedayo înan.

MERKEZÊ XEBERAN