Bi çekanê kimyewîyan hêrîşa Kurdan û xozaya Kurdistanî kenê

pêncşem 14 tîrmehê 2022 - 16:23

  • Îdarekarê Rêxistinê Xozaya Kurdistanî Sarwar Qeredaxîyî va Tirkîya û Îran xozaya Kurdistanî talan kenê.

 

Îdarekarê Rêxistinê Xozaya Kurdistanî Sarwar Qeredaxîyî va Tirkîya û Îran xozaya Kurdistanî talan kenê.

Îdarekarê Rêxistinê Xozaya Kurdistanî Sarwar Qeredaxîyî derheqê hêrîşe û şuxilnayîşê çekanê kîmyewîyanê Tirkîya de va, “Tirkîya û Îran xozaya Kurdistanî talan kenê, bi şuxilnayîşê çekanê kîmyewîyan tena gerîlayan şehîd nêkenê, bitemamî gandeyan zî qir kenê. Îdareyê Başûrî bîyo xulamê dişmenî, qet îradeyê înan nêmendo. Ganî ma seba ameyoxî wayîrê xozaya Kurdistanî bivejîyê.”

‘Komeleya Derûdorpawitişî seba hişyarkerdişê şarî ameya awankerdiş’

Sarwar Qeredaxîyî va, “1991î ra dima meseleya derûdorî Kurdistanê Başûrî de kewta rojane. Şar dest bi birnayîşê daran kerdibi. Komeleya Derûdorpawitişî seba ke şarî hîşyar û xeberdar bikera ameye awankerdiş. Ewro Kurdistanê Başûrî de meseleye ma, yê verênan ra cîyayêr ê. Vetişê petrolî, çinbîyayîşê projeyê têpîya gurînayîşî, hûmara wesayîtan, bombavarnayîşê ke tim dewam kenê û birnayîşê daran. Goreyê malûmatan do 2050an de bandorê înan do zêde bê.”

‘Xozaye jehrî kenê’

Sarwan Qeredaxî derheqê hêrîşanê Tirkîya û Îranî de va, “Xeylê doliman Kurdistanê Başûrî de çekê kimyawîyî ameyê şuxilnayîş. Bi çekanê kîmyewîyan tena gerîlayan şehîd nêkenê, bitemamî gandaran qir kenê. Awa Kurdistanî gemarî kenê û xozaye jehrî kenê. Cayê ke çekê kîmyewîyî ameyê gurînayîş, hinî tede rence nêbena. Tirkîya û Îran tarîx û xozaya Kurdistanî orte ra wedarenê. Heto bîn ra darî yenê birnayîş û rotiş. Darê 100 serrîyî hetê Tirkan ra ameyê birnayîş.”

‘Îdarekarê Başûrî bîyê xulamê dişmenî’

Sarwan Qeredaxîyî derheqê îdarekaranê Başûrî de va, “Wexto ke ma vanê îdarekarê Başûrî, ganî ma vajê 2 serdestê Başûrî PDK û YNK. Her di serdestî zî hetê dişmenanê Kurdan ra ameyê kirakerdiş. Coka înan ra qet veng nêvejîyeno ke çi ameyo xozaya Kurdistanî ser. Îdadeyê înan çin o ke vernîyê îşxalî bigerê. Ganî nê serdestî hinî şorê. Heta nê bibê Kurdistan aram nêbeno.”

‘Seba ameyoxî derûdorî bipawê’

Îdarekarê Rexistinê Xozaya Kurdistanî Sarwan Qeredaxîyî peynî de va, “Qirkerdiş û gemarkerdişê erdê Kurdistanê Başûrî, bandorê leteyanê leteyanê bînan zî keno. Bi taybetî bandorê Kurdan keno. Ganî şarî Başûrî û pêro Kurdî xozaya xo bipawê. Çinbîyayîşê xozaye, çinbîyayîşê cuye yo. Seba ke ma cuye bipawê, cuya gandeyan bipawê û xozaye nifşanê newîyan rê biverdê, ganî ma pêro pîya vera qirkerdiş û talankerdişî de vinderê.”

ROJNEWS/SILÊMANÎ

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.