Bîlmez: Xoverdayîşo komelkî lazim o

• Awiqat Îbrahîm Bîlmezî va, “Tecrîd problemêko komelkî yo, ganî vera ci xoverdayîşo şerîk bêro dayene.”

ERGÎN ÇAGLAR MA / ÎSTANBÛL

Serekê PKKyî Abdullah Ocalan 23 serran ra nat hepisxaneyê Îmraliyî de binê tecrîdî de yo û ci ra 17 aşman ra nat xebere nêgerîyena. Ocalan badê greva vêşanîye ya 200 rojan ra dima eşkabi 2yê Gulane 2019î de awiqatanê xo bêro têhet. O wext 5 pêvînayîşî bîyê û ê wextî ra nat cezayanê dîsîplînî ver awiqatî nêşkenê Ocalanî de pêvînayîşêk bikerê. Pêvînayîşê keyeyan zî yenê astengkerdiş. Abdullah Ocalanî tewr peynî eşka 25ê Adare 2021î de birayê xo Mehmet Ocalanî de telefonî de qisey bikero.

Muracaatê ke hetê awiqatan û keyeyan ra yenê kerdene bêcewab manenê. Awiqatanê Buroya Hiqûqî ya Seserre ra Îbrahîm Bîlmezî na rewşe erjnaya.

‘Teberê hiqûqî de yo’

Awiqat Îbrahîm Bîlmezî va, “1999î ra nat Îmrali de hiqûq çin o. Îmrali cayêko normal nîyo, senî ke bejî ra cîya yo, eynî wextî de teberê hiqûqî de yo. ma 17 aşman ra nat nêşkenê muvekkîlê xo de pêvînayîşêk bikerê. Muraceatê qanûnîyî bi bêhiqûqîye yenê redkerdiş.”

‘Bi OHALî astengîyê pêvînayîşî bîyê qanûnî’

Bilmezî va, “1999î ra heta 2016î înan vatêne ‘Keştîye xeripîyayî ya’ la OHALî ra dima hinî astengîyê pêvînayîşî bîyê qanûnî. Verî cû goreyê hiqûqî pêro pêvînayîşî nêameyêne astengkerdiş la badê îlankerdişê OHALî, hetê Hakîmtîya Înfazî ya Bursayî ra derheqê Îmraliyî de qerarêk ame girewtiş. Bi nê qerarî pêvînayîşê Abdullah Ocalan û 3 muvekkîlanê ma yê bînan bêbinge û bêsebeb ameyê astengkerdiş û qedexekerdiş. Çîyêko winasî reya ewile bîyêne. Bingeyê xo çin bi la dima bi qerarnameyanê OHALî înan waşt pîneyêko qanûnî binî pa û maddeyêk îlaweyê Qanûnê Înfazê Cezayî bi.Bi nê maddeyî pêvînayîşî eşkenê asteng bibê û no madde nika yeno ramitene.”

‘Herinda hiqûqî zorbatîye girewte’

Bîlmezî dewamê qiseyanê xo de va, “Nika cezayanê dîsîplînî ver ma nêşkenê pêvînayîşêk bikerê. La xebera ma nê cezayan ra nêbena û teblîxê ma nêbenê. Ma vanê tedeyîya qerarî û dosya ma rê bierşawê, ma bivînê ke sebebî çi yê la dosyayî ma ra yenê nimitene. Muvekkîlê ma zanê ke nê qerarî bêhiqûq ê coka îtîraz zî nêkenê. Xora Birêz Ocalanî verî ra nat îtîraz nêkerdêne. Muvekkîlanê bînan rey-rey îtîraz kerdêne la ê zî hinî nêkenê. Îmraliyî de herinda hiqûqî zorbatîye girewte.”

‘Ganî çalakîyê demokratîkî bêrê kerdene’

Awiqat Îbrahîm Bîlmezî peynî de va, “775 awiqatan seba ke Birêz Ocalanî û girewtîyanê bînan de pêvînayîşî bibê muraceatê Hakîmtîya Bursayî kerd û no raşta zî zaf muhîm bi. Xebat û têgêrayîşê winasî do bandor bikerê. Ganî çalakîyê kuçeyan bibê û waştişê demokratîkî bizêdîyê. Çimkî na mesele komelkî ya. Ganî her kes fam bikero û têbigêro. Tecrîdê Îmraliyî girêdayîyê meseleya Kurdan a. Tirkîya de bêhiqûqîye daya çaqeyî. Îqtîdar seba ke bieşko îqtîdarê xo biramno, polîtîkayanê şer û ewlehîye ra paştî geno. Nê pêroyî girêdayîyê tecrîdê Birêz Ocalanî yê. Ganî nê bêrê famkerdiş.”