Botan: Sûcê şerî yê Tirkîya yenê mîyankerdene

Sîyasetmedaro Kurd Lezgîn Botanî dîyar kerd ke, dewletî seba menfeatê xo sûcanê Tirkîya mîyan kenê û Tirkîya zî înan ra paştî gena û hêrîşanê kîmyewîyan ramnena.

Tirkîya vera Başûrê Kurdistanî 7 aşman ra nat hêrîşanê xo ramnena. Goreyê malûmatanê HSMyî, nê 7 aşman de hetê Tirkîya ra 2 hezar 837 rey çekê kîmyewîyî ameyê gurînayîş. Vera hêrîşanê kîmyewîyan çalakîyê Kurdanê ewrûpayî dewam kenê û vila benê. Muraceatî yenê kerdene û çalakîyê girseyî zî dewam kenê. Sîyasetmedar Lezgîn Botanî nê çalakîyan ser o erjnayîşî kerdê û dîyar kerd ke, Tirkîya dewletanê NATOyî ra paştî gena.

Têgêrayîşê dewletan

Botanî dîyar kerd ke, goreyê Protokolê Cenevreyî gurînayîşê kîmyewîyan qedexe yo. Reyna dîyar kerd ke, ganî dewletê îmzakerdoxî seba ke cigêrayîşî bêrê kerdene têbigêrê.

Botanî va, “Dewletê menfeatanê xo yê ekonomîk, sîyasî û eskerîyan ver sûcanê şerî yê Tirkîya mîyan kenê. Dewleta Tirke zî na rewşe ra paştî gena. Tirkîya bi endamanê NATOyî yê Amerîka, Almanya, Fransa û Îngîltereyî reyde şerîkîya xo ramnena. Polîtîkayanê Rusyayî yê îşxalkarîye rê hetkarîye kena. Cigêrayîşê kîmyewîyan ca verdê, Rusya, Amerîka û NATO îşxalê Serêkanîyê û Efrîn rê veng nêkerd û înan şermezar zî nêkerd. Tirkîya bineyk zî ney ra paştî gena û vera Kurdan çekanê kîmyewîyan gurînena.”

Hêrîşê çekanê kîmyewîyan

Botanî peynî de va, “Tirkîya verî cû zî vera Kurdan kîmyewîyî gurînayê. Belgeyî estê ke Dêrsim de 70 hezar kesê bêçekî, cinî û domanî bi kîmyewîyan ameyê qetilkerdiş. 1992yî de Cûdî de û 2011î de zî Çelê de Gelîyê Tîyarê de kîmyewîyî ameyê gurînayîş. Hêrîşê Zap, Metîna û Avaşînî zî 7 aşmî ra nat yenê kerdene.”

MERKEZÊ XEBERAN