HSMyî ra derheqê kîmyewîyan de gazîye

HSMyî malûmatê xo de dîyar kerd ke, Hulusî Akar hêrîşanê kîmyewîyan înkar keno û heyetanê xoseran rê gazîye ameye kerdene ke cigêrayîşan bikerê.

Hêrîşê Tirkîya yê kîmyewîyî yê Zap, Avaşîn û Metînayî rojaneyê meclîse ra nêkewenê. Butçeya Wezaretîya Pawitişî de hetê parlamenteranê HDPyî ra hêrîşê kîmyewîyî ameyê perskerdene.

Akar: Ma teber ra kesî qebul nêkenê

Wezîrê Pawitişî Hulusî Akarî, reyna va envanterê ma de nê çekî çin ê û va, “Goreyê muqaveleyan ameyo dîyarkerdiş ke, xazê hêsiran eşkeno bêro gurînayene.” Akarî derheqê cigêrayîşan de va, “Ma eşekenê xo bi xo kontrol bikerê û xo bierjnê. Ma teber ra kesî qebul nêkenê.”

Akarî îddîa kerd ke, heyetêk ameya erşawitiş, cigêrayîşî ameyê kerdene û netîceya cigêrayîşan de çîyêk nêvejîyayo.

HSMyî ra malûmatêk

Hetê Fermandarîya HSMyî ra derheqê îddîayanê Akarî de malûmatêk ame dayene. Malûmatî de ame dîyarkerdiş ke, 9ê kanûne yo ke Akarî qisey kerdêne de zî dewa Sîdayî ya Şêladizêyî de kîmyewîyî ameyê gurînayîş.

Heyetanê xoseran rê gazîye

Malûmatî de ame  dîyarkerdiş ke, Tirkîya vana ma destê xo heyetêk erşawito û no zî yeno vateyê îtîrafê sûcanê şerî. Goreyê malûmatî 7,8 û 9ê kanûne de 150 rey kîmyewîyî ameyê gurînayîş û ameyo vatiş ke, “Cayo ke kîmyewîyî ameyê gurînayîş rayîrê xo asfalt o û seba cigêrayîşan zî musaît o. Ma gazîya heyetanê xoseran kenê ke, wa bêrê tîya de cigêrayîşan bikerê û heqîqetan bi çimanê xo bivînê.”

MERKEZÊ XEBERAN