Vera hêrîşanê kîmyewîyan gazîya çalakîyan ameye kerdene

• Seba ke Kurdistanê Başûrî de hetê Tirkîya ra gurînayîşê çekanê kîmyewîyan bêro protestokerdiş, KON-MEDî ra gazîye ameye kerdene.

KON-MED(Konfederasyonê Komelanê Kurdistanijanê Elmanyayî)î seba ke hêrîşê kîmyewîyî yê Tirkîya bêrê protestokerdiş, pêro Kurdî silaynayê meydan û kuçeyan.

HPG eşkera kerdibi ke 17 gerîlayî hêrîşanê kîmyewîyan de merdê. KON-MEDî dîyar kerd ke hêrîşê kîmyewîyî yê Tirkîya bi sistematik yenê kerdene.

KON-MEDî malûmatê xo de va, “Bin ê hêrîşan Tirkîya wazena şarê Kurdî û Hereketê Azadîye tasfiye bikera. Nê hêrîşan de qanûnê mîyannetewîyî binpay benê û sûcê şerî yenê kerdene. Dewleta tirke hêrîşanê xo bi sîstematîke ramena.”

‘Mebê şerîkê sûcî’

Malûmatê KON-MEDî de ame vatiş ke, “Dewleta tirke qanûnanê mîyannetewîyan binpay kena û sûcanê şerî kena. Dezgeyanê mîyannetewîyan ra veng nêvejîya û nêvejîyeno. Bi na bêvengîya xo, ê zî benê şerîkê nê qetlîamî. Ma pêro dezgeyanê mîyannetewîyan ra vanê; paştî medê hêrîşanê dewleta tirk a nîjadpereste û polîtîkayanê ci yê qetlîamkaran. Mebê şerîkê nê sûcê merdimîye. Ma pêroyê Kurdistanijan û dostane Kurdan vera nê qetlîaman silaynenê meydanan.”

MERKEZÊ XEBERAN