Seba pawitişê rûmetê merdimatîye têbigêrê

pêncşem 20 Çiriyê 2022 - 10:20

  • Derheqê hêrîşanê kîmyewîyan ê Tirkîya de hetê DTK, DBP, TJA, KKP û HDP ra Kurdan rê û raya pêroyîya mîyannetewîye rê gazîye ameye kerdene.

Hetê DTK, DBP, TJA, KKP û HDPyî ra derheqê hêrîşanê kîmyewîyan ê Tirkîya yê Kurdistanê Başûrî de malûmatêk ame dayene. Malûmat awanîya DBPyî ya Dîyarbekirî de ame dayene û temsîlkaranê partîyan qisey kerd.

‘Sûcê merdimatîye yeno kerdene’ 

Hemserekê DTKyî Berdan Ozturkî va, “Tirkîya îşxalkerdişê Kurdistanê Başûrî de çekanê kîmyewîyan gurînena. Şer 2015î de bi girankerdişê tecrîdê Îmraliyî newe ra dest pêkerd. Îqtîdarê AKP-MHPyî konsepte şerî giran keno. Îqtîdar sûcê merdimatîye keno. Çekê qedexekerdeyî Kurdistan de yenê gurînayîş. Dewletê ke mîyanê Neteweyanê Yewbîyayeyan de yê nê çekan roşenê Tirkîya.”

‘Bêvengîye cesaret dano’ 

Ozturkî va, “Gurînayîşê çekanê kîmyewîyan bi muqaveleyê Cenevreyî ameyo qdexekerdiş. Xeylê doliman gazîyî ameyê kerdene la sere de NY û dezgeyanê bînan ra veng nêvejîya û ê bêveng mendê. Dîmenan ra zî aseno ke, vera merdimatîye sûc yeno kerdene. Tirkîya bêvengîye ra paştî gena. Rûmetê merdimatîye Kurdistan de yeno binpaykerdiş. No nîno qebulkerdiş. Ma ganî vera nînan de vinderê û her warî de vera nînan têbigêrê.”

‘Merdimatîye deyndarê Kurdan a’ 

Ozturkî dewamê qiseykerdişê xo de va, “Kurdan Rojava de merdimatîye pawite û ê serkewtê. Merdimatîye deyndarê Kurdan a. Ganî seba deynê xo ewro têbigêra. Kurdan sey labaratuarî vînenê. Saddam zî Helebçe de eynî çî kerd. Eke o wext çîyêk biameyêne kerdene, ewro Tirkîya nêşkayêne nîya bikera. Ganî verî şarê ma yê Kurdistanê Başûrî vengê xo berz bikero. Îqtîdarê AKP-MHPyî do miheqeq hesabê nê sûcan bido.”

‘Wazenê Kurdan qir bikerê’

Parlamentera HDPyî ya Dîyarbekirî Remzîye Tosûne va, “Wazenê Kurdan qir bikerê. Dîmenan ra zî aseno ke çeke kîmyewîyî yenê gurînayîş. Ganî dinya vera nê wehşetî bêveng memana. 6 aşmî de 3 hezar rey çekê kîmyewîyî ameye gurînayîş. Îqtîdar wazeno sîyasetê xo bi şerî biramno. Ganî şar ney qebul mekero û merdimatîye ganî vera nê sûcî beveng meba. Ewro nê çekî vera Kurdan yenê gurîyayîş la wa xo vîrî ra mekerê ke do meşte vera şaranê bînan zî do bêrê gurînayîş.”

Vera hêrîşan gazîya yewbîyayîşî

Serekê KKPyî Sînan Çîftyurekî va, “Tirkîya 100 serrî ra nat vera Kurdan çekanê kîmyewîyan gurînena. Demêko dergî ra nat Kurdistanê Başûrî de şerêko bênîzam esto. Ma nê şerî şermezar kenê. Samdamî zî nê çekî gurînayê la nêşkayê verê xoverdayîşê azadîye bigerê. No şer vera merdimatîye yeno kerdene. Ganî cade hêrîşê kîmyewîyî bêrê vindertiş. Bi şîdetî netîce nîna girewtene. Ganî Kurdî vera nê hêrîşan yew bibê.”

Aydenîze: PDK û Barzanî şerîkê sûcî yê

Hemsereka DBPyî Salîha Aydenîze va, “Hetê Tirkîya ra xeylê reyan çeke kîmyewîyî ameyê gurînayîş. Hetê Heyetê Doktoran ra raporêk ame hedrekerdiş û gurînayîşê çekan ame tespîtkerdiş. Tirkîya NATO ra û bêvengîya dinya ra paştî gena û nê hêrîşanê xo ramnena. Hetê PDK û keyeyê Barzanî ra vernîyê îşxalî ameyo akerdene û ê zî şerîkê nê sûcî yê.”

Rêxistinanê mîyannetewîyan rê gazîye

Aydenîze va, “Ganî rêxistinê mîyannetewîyî vera nê hêrîşan têbigerê. Eke ê wextêko winasî de çîyêk nêkenê, eşkera yo ke ê berpirsîyarîya xo ca nêanê. Ewro hetê Tirkîya ra sûcê merdimatîye yeno kerdene. Ganî kesê wayîrê wijdanî vera nê sûcî bêveng memanê. Ma do vera nê sûcan timûtim xo ver bide. Ganî sere de Kurdî û cîhetê bînî vera nê sûcî vengê xo berz bikerê û xoverdayîşê xo pîl bikerê. Ma ganî bêveng memanê. Faşîzm bi bêvengîye û tersî pay ra maneno.”

MA / AMED

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.