Bozan: Şarî mesaj da ke do wayîrê îradeyê xo bivejîyo

YENÎ YAŞAM / Selman ÇÎÇEK

Parlamenterê DEM Partî yê Mersînî Elî Bozanî dîyar kerd ke şarî eleqayo pîl ramojna verweçînayîşî û no zî rejîmê qeyûmî rê cewabêk o.

Partîya Têduştî û Demokrasî ya Şaran (DEM Partî), seba ke endamanê weçînayîşanê herêmîyan dîyar bikera 13-14ê Çeleyî de xeylê merkezî de verweçînayîş kerd. Delegeyê partî şîyê sindoqan ser û înan raya xo daye. Parlamenterê DEM Partî yê Mersînî Elî Bozanî verweçînayîşî ser o erjnayîşî kerdê.

Bozanî dîyar kerd ke 3 rojî yo verweçînayîşan teqîbb keno û va, “Weçînayîşê 14ê Gulane ra dima, şarî rexne û pêznîyazî kerdê û waşt wa dîyarkerdişê namzetan de şar ca bigero. Waştişê înan bi nê raydayîşê şarî yeno caardene. Coka, şarî de heyecanêk peyda bîyo. Ma reya verêne ceribnayîşêko wisasî cuwîyenê û nê ma de hîsê ecêbî peyda kerdê. Ma tayê cayan de dî ke şefeq de dayîk û babîyî dewan ra ameyê. Demêko derg şarê ma dore de vindert ke raya xo bierzo. 3 rojî yo Kurdistan de şar wayîrê îradeyê xo vejîyeno û îradeyê xo bi destê xo dîyar keno.”

Şar wayîrê îradeyê xo vejîyeno

Bozanî bale ante eleqayê şarî ser o û va, “Tayê hetan ra kêmanîyê ma bîyê. Seba ke no seba na çîyêko newe bi tayî kêmanîyî bîyê. Şarê ma eleqayêko pîl ramojna û no zî dîyar keno ke şarê ma wayîrê îradeyê xo vejîyeno. Şar ewro cewab dano rejîmê qeyûmî. Eynî wext de ramojneno ke 31ê Adare dimado senî wayîrê îradeyê xo bivejîyo.”