Çîftyurek: Ganî Abdullah Ocalan qisey bikero

Parlamenterê DEM Partî yê Wanî Sînan Çîftyurekî fikranê Abdullah Ocalanî ra tersenê û va, “Ganî tecrîd wedarîyo, Ocalan qisey bikero.”

Serekê PKKyî Abdullah Ocalanî ra 34 aşmî yo xebere nîna girewtene. Parlamenterê DEM Partî yê Wanî Sînan Çîftyurekî derheqê kampanyaya globale de erjnayîşî kerdê.

Çîftyurekî dîyar kerd ke seserra 21ine de Kurdî yenê înkarkerdiş û hinî Kurdî statu wazenê. Ey va, “Eke meseleya Kurd û Kurdistanî çin a, na dewlete 100 serrî yo kamî de şer kena. Eke meseleya Kurdan çin a, çir abi hezaran hepsîyê sîyasîyî hepisxaneyan de yê. Çira Dayîkê Haştîye tim haştîye wazenê. Her kes zano ke na mesele meseleya ‘teror’î nîya, meseleya azadîye ya.”

Çareserîya demokratîke

Çîftyurekî  va, “Seba ke meseleya Kurdan bi rayanê haştîyane bêra çareserkerdene rayberê Kurdan û îdarekarê dewlete pîya roniştê. Meseleya Kurdan est a û bi înkarkerdişî na mesele çareser nêbena. Kurdî ewro statu wazenê û no waştiş seba Kurdan heqêqo bingeyî yo. Seba ke meseleya Kurdan bêra çareserkerdene ganî dewlete verî Rayberê Şarê Kurdî Abdullah Ocalanî û aktoranê bînan de qisey bikera û na mesele ganî bi rayanê demokratîkan çareser biba.”

‘Dewlete Ocalanî ra tersena’

Çîftyurekî dîyar kerd ke ganî Abdullah Ocalan cade bieşko keye û awiqatanê xo de pêvînayîşan bikero û va, “Ewro mîlyonî fikranê Ocalanî ra bawer ê. Nê însanî rewşa rayberê xo meraq kenê. Labelê ewro dewlete Ocalanî ra tersena. Coka wazena têkilîye bibirna. Dewlete tersena ke meseleya Kurdan bi rayanê demokratîkan çareser biba.”

‘Ganî waştişî bêrê caardene’

Çîftyurekî dîyar kerd ke çalakîye ke bi waştişê wedarnayîşê tecrîdî yenê kerdene her ca de dewam kenê û dîyar kerd ke ganî waştişê girewteyanê sîyasîyan û çalakwanan bêrê caardene. Ey va, “Eke keye û awiqatanê Ocalanî bieşkayêne zîyaret bikerdêdne, Ocalanî xeylê meseleyan de fikrê xo vatêne. Tecrîdî wedarê ke wa Ocalan qisey bikero. Çira tecrîdî ramnenê, çunke Ocalanî ra tersenê. Çunke Ocalan sîyasetê Rojhelatê Mîyanênî baş waneno û analîz keno. Dewlete ganî polîtîkayanê xo biterikna û tecrîdî wedarna.”

MA / WAN