Cayê tarîxîyî hetê Tirkîya ra yenê talankerdiş

• Hetê Tirkîya û çeteyanê ci ra cayê tarîxîyî yê Bakur û Rojhelatê Sûrîyeyî yenê talankerdiş.

Kantonê Grê Sipîyî 9ê Teşrîna Verêne 2019î de hetê Tirkîya û çeteyanê ci ra ame îşxalkerdiş. Hetê înan ra cayê tarîxîyî ameyê talankerdiş û seba ke nasnameyê kulturî yê nê cayan bivurnê, nê cayan de cayê eskerîyî ameyê viraştene.

Goreyê çimeyanê mintiqa xeylê cayê tarîxîyî ameyê talankerdiş. Tel Sehlan, El Dehlîz, Sebî El Ebyed û bajarê El Farî ameyê talankerdiş. Warê arkeolojîkî yê Kefîfayî de cayê eskerîyî virazîyayê.

Hetê Buroya Pawitişî ya Cayanê Tarîxîyan a Kntonê Girê Sipîyî ra demêk verî cû malûmatêk ame kerdene. Goreyê malûmatan, MÎT çeteyan reyde warê Hewîceyî de kinitişan keno û berhemanê tarîxîyan kirişneno Tirkîya.

Derheqê meseleye de endamê buroye Ferhad Şukrîyî va, “Tirkîyaya îşxalkare, roja îşxalî ra nat seba ke nasnameyê ma çin bikera cayanê tarîxîyan talan kena û berhemanê tarîxîyan tirawena. Bi hacetanê taybetan û wesayîtanê eskerî kinitişî yenê kerdene û nê pêroyî hetê ma ra ameyê tespîtkerdiş. Sîmsarî MÎTî de pêkenê û berhemê tarîxîyî bi destê înan kirişîyenê Tirkîya.”

Şukrîyî va, “Bi nê binpaykerdişan û talankerdişan Tirkîya wazena nasnameyê kulturî yê mintiqa çin bikera. Seba ke nê cayê tarîxîyî bêrê pawitiş, ganî hetê dezgeyanê mîyannetewîyan ra xebatî bêrê ramitene û seba vindarnayîşê hêrîşan Tirkîya rê tehda bêra kerdene.”

Goreyê malûmatanê Komîteya Kulturî ya Îdareyê Xoserî yê Mintiqaya Firatî, Kantonê Girê Sipîyî de 47 warê cuye hetê Tirkîya ra ameyê îşxalkerdiş.

ANHA / EYN ÎSA