Festîvalê qeyyûmî rê rexne: Senî wîjdanê înan geno ke beşdar benê?

• Hetê walîtîye, qeyyûm û qeymeqamtîye ra do Cizîr de festîvalê muzîkî bivirazîyo. Festîvalê qeyyûmî hetê hemserekê Beledîyeya Cizîrî ra ame rexnekerdiş.

Qeyyûmê Beledîyeya Cizîre hedreyîye keno ke dejanê şarî ser de festîvalêk bivirazo. Cizîr de 2015î de mîyanê 79 rojan de 177ê înan ‘bodrûmanê wehşetî’ de 288 kesî ameyê qetilkerdiş. Mabên ra 7 serrî vîyertê la hema zî cinazayê 14 kesan nêameyê dîyayîş. Badê qedexeyê tebervejîyayîşî Beledîyeya Cizîre rê qeyyûm ame tayînkerdiş û beledîye DBP ra ameye girewtene. Qeyyûmî verî cû molozî kiriştê kişta Çemê Dîcleyî. Mîyanê molozan de leteyê cinazayan vejîyayê. Dima no cayê molozan bi parka Mem û Zîne. Nika zî eynî ca de hetê Walîtîya Şirnexî, Qeyyûmê Beledîyeya Cizîrî û qeymeqamtîye ra do festîvalê muzîkî bêro viraştiş. Goreyê malûmatan do 30ê Teşrîna Verêne de festîval bêro viraştene û Tara Mamedova, Xêro Abbas, Sefo, Kuruluş Kuş û Burak Bulut bibê beşdarê festîvalî.

Festîvalê muzîkî hetê şarî ra yeno rexnekerdiş. Hemserekê Beledîyeya Cizîrî Mehmet Zirigî dîyar kerd ke viraştişê festîvalî erjanê şarê Kurdî rê heqeret o.

Merdimî bodrûman de ameyê vêşnayene

Mehmet Zirigî va, “Cayê festîvalî bi zanayîş ameyo weçînayîş. 2015-2016î de Cizîr hetê faşîzmê AKP-MHPyî ra bi tank û topa name wêrankerdiş. Bi seyan merdimi ameyê qetilkerdiş. O wext bodrûman de merdimi ameyê vêşnayene. Molozê nê cayan kirişîya tîya û na parke tede ameye viraştene. Beno ke mîyanê nê molozan de cinazayî estê. Tîya bi zanayîş ameyo weçînayîş. Zanê ke no ca seba şarê Cizîrî xesas o. Esteyê domananê şarê ma binê na parke de yê. Tîya de dayîşê konseran şarê ma rê heqeret o. Ma ra vanê, ma Cizîr wêran kerd, ma cinazayî vistê binê na parke û ma do nika ser de keyf bikerê. Na parke coka ameye weçînayene.”

Erjanê şarê Kurdî rê hêrîşe

Zirigî va, “Ganî şarê ma bibo wayîrê hişmendîye. Her kes ganî meqsedê walîtîya Şirnexî fam bikero. Meqsedê înan erjanê şarê Cizîrî rê heqeret o. Walîtîye û qeyyûm bîyê yew û wazenê esteyanê domananê şarî ser de moze bikerê. Ganî şar destûr nêdo nê heqeretî.”

Polîtîkayê şerî yê leyşinî

Dewamê qiseykerdişê xo de Mehmet Zirigî va, “Îqtîdarê AKP-MHPyî bi pêro hêza dewlete Kurdistan de şerêko gemarin ramneno. Ê çiqas hêze ra kewenê, hêrîşanê xo hende zêdînenê. Seba şarê Kurdî, cayanê xesasan ra yew Sûr bi. Nînan waşt uca de çîyêko winasî bikerê. Ê do biwazê Nisêbîn de zî eynî çî bikerê. wazenê asîmîlasyonê kulturîyî biramnê. Wa şarê ma vera kayanê înan haydar bo. Wazenê verê weçînitişî propagandaya xo bikerê. AKP ewro nêşkeno 2 kesan biyaro têhet û kerdenanê xo bi destê walîtî û qeymeqamtîyan ca ano.”

Xêro Abbas û Tara Mamedova rê gazîye

Mehmet Zirigî hunermendan rê gazîye kerde û va, “Erjanê Kurdan ser o kayan kay kenê û wazenê Kurdan zî bifînê kayê xo mîyan. Yeno îddîakerdiş ke do Xêro Abbas û Tara Mamodova zî beşdarê nê ‘festîval’î bibê. Nê hunermendî xoverdayîşê Kurdan şinasnenê. Ê erjanê Kurdan zanê û zanê ke AKP senî hêrîşa erjanê Kurdan keno. Eke beşdarbîyayîşê înan raşt o, ê do bi kamcîn wîjdan û exlaqî bêrê cinazayanê şarê Kurdî ser o deyîran vajê? Wîjdanê înan destûr dano nê çîyî? Eke ê beşdar bibê, ê do bibê hacetê kayanê gemarinan. Ma înan ra vanê, eke ê qasê mîsqalêk qîmet danê erjanê şarê Kurdî, wa mebê hacete nê kayan.”

MA / ŞIRNEX