‘Festîval’ê Cizîrî rê rexne: Leteyê şerê taybetî yo

• Derheqê festîvalê qeyyûm û waîlîtîye de cinîyanê Cizîrijan dîyar kerd ke, no festîval leteyê şerê taybetî yo.

Festîvalê Walîtîya Şirnaxî û qeyyûmê Beledîyeya Cizîrî rê nêrazîbîyayîşî zêdîyenê. Xêro Abbas û Tara Mamedova dîyar kerdibî ke do mebê beşdarê nê festîvalî. Keyeyê ke domanê înan Cizîr de ameybî qetilkerdiş û şarê Cizîrî nêwazenê serê esteyanê merdeyan de ‘festîval’êk bêro viraştene. 

Hetê Hemsereka HDPyî ya Şirnexî Sabuha Akdage, Hemsereka HDPyî ya Cizîrî Zîlan Ecevîte û Aktîvîsta TJAyî Guler Tunçe ra derheqê meqsedê viraştişê festîvalî de erjnayîşî ameyê kerdene.

‘Cizîr tesaduf nîyo’

Aktîvîsta TJAyî Guler Tunçe va, “Viraştişê nê festîvalan leteyê şerê taybetî yê. 30ê Teşrîna Verêne de do sponsorîya qeyyûmî de tîya de festîvalêk bêro viraştene. Mîyanê hunermendan de Kurtuluş Kuş zî esto. No merdim çend aşmî verî cû tecawuzê cinîyêke kerdibi. Dewaya ci hema zî dewam kena. Dewlete bi zanayene 7 serrî ra nat mintiqaya Botanî de polîtîkayanê taybetan ramnena. Nê hunermendî zî bi taybet ameyê weçînayîş. Senî ke eskeran, polîsan û qorîcîyan weçînenê û erşawenê tîya, hunermendan zî weçînenê. Ciwananê Kurdan ser de polîtîkayê taybetî yenê ramitene. Mas ey TJAyî vera nê polîtîkayan têgêrenê. Coka ma ciwananê xo ra vanê wa meşorê ê festîvalî. Ma xo vîrî ra nêkerdo ke 7 serrî verî cû tîya de çi qewimîya. Înan ke xo vîrî ra kerdo, înan xo kerdo vîndî û nasnameyê xo xo vîrî ra kerdo. Demêk verê cû Sûr de festîval virazîya. Nika zî wazenê Cizîr de virazê. Nê cayî tesaduf nîyê. Serê esteyanê domananê Cizîrî de festîval viraştiş mesajêk o. Cinîyê Kurdî û ciwanê Kurdî ganî verê nê polîtîkayan bigerê.”

‘Serê esteyanê domananê ma de festîval’

Hemsereka HDPyî ya Şirnexî Sabuha Akdage va, “Festîvalî cayanê xirabekerdîyan de yenê viraştene. Wazenê bin ê festîvalî erjanê maç in bikerê. No festîval seba Kurdan nîno viraştene, seba çinkerdişê werjanê Kurdan yeno viraştene. Mîyanê hunermendan de tecawuzkarêk esto. Ma şarê xo ra vanê wa meşorê nê festîvalî. Ma nêwazenê şar şêro uca esteyanê domananê ma ser de kay bikero.”

‘Wazenê erjanê ma çin bikerê’ 

Hemsereka HDPyî ya Cizîrî Zîlan Ecevîte va, “30ê Teşrîna Verêne tarîxê belediyeye rê qeyyûmeştişî yo. Parka Mem û Zîne de viraştişê festîvalî yewna çî îfade keno. Çumke şar tîya ra vano ‘parka gonîne’. Seba Cizîrijan pêro parke kişta Dîcleyî parke gonîn ê. A parke bi zanayîş ameye weçînayîş. Nika zî vanê Kurtuluş Kuş do bivejîyo sehne. No ca sey zîyaretî yo û no merdim senî senî eşkeno bêro tîya? Man êwazenê no festîval bêro viraştene. Nika ra keyeyan rê û wendegehan rê seba ke beşdarê festîvalî bê mesajî erşawîyenê. No festîval vera erjanê ma yeno viraştene û ganî şarê ma mebo beşdarê nê festîvalî.”

MA / ŞIRNEX