Rêxistinanê Ziwan û Kulturî ra gazîye: Beşdarê nê ‘festîval’î mebê

Rêxistinan dîyar kerd ke no ‘festîval’ do asîmîlasyonî rê xizmet bikero û qirkerdişê kulturî xorîn bikero.

Hetê Wezaretîya Kulturî û qeyyûman ra do mabênê 8-16ê Teşrîna Verêne de Sûr de ‘festîvalêk’ bêro viraştene. Derheqê meseleye de hetê 8 rêxistinanê kultur,ziwan û hunerî ra malûmatêk ame dayene.

Malûmat bi sernameyê ‘Rîyê şima û ayîrê şima tarî yo’ ame weşanayene. Malûmatî de ame vatiş ke, “M abi eşkera dîyar kenê ke, eleqayê nê festîvalî û kulturî pîya çin o. Meqsedê nê festîvalî asîmîlasyon o. No zî mojneno me ke, bi nê festîvalî do tarîx, kultur û hunerê şaranê Sûrî raştê hêrîşan bêrê.”

‘Erjanê şarê Kurdî rê hêrîşkerdiş o’

 Malûmatî de ame vatiş ke, “Sûr wayîrê hefizaya se serran o û her cayê Sûrî kulturê şaran ramojneno. Mîmarîya sûrî û kemerê ci nasnameyê şaran dîyar kenê. Netîceya polîtîkayanê înkar û asîmîlasyonî Sûr ame rijnayîş. No hedîse hema zî vîrê Kurdan de û şaran de gande yo. Birînî hema weş nêbîyê û dejî vîrî ra nêşîyê. Binê awanîyanê tarîxîyan ra cendekê merdiman vejîyenê û cinazayî qûtîyan de yenê dayene. Rewşêka winasî de Sûr de festîval viraştiş, her çî ra ver erjanê û pîrozanê şarê Kurdî rê hêrîşkerdiş o. Hetêk ra konser û tîyatroyî yenê qedexekerdiş û hetêk ra festîval virazenê. Na nakokîyêka pîl a.”

‘Hunermendê beşdarî do asîmîlasyonî rê xizmet bikerê’

Dewamê malûmatî de ame vatiş ke, “Festîvalo ke do bi nameyê ‘rayîrê kulturî’ bêro viraştene, mela faşîzm û asîmîlasyonî rê xizmet bikero. Hunermendê ke beşdarê festîvalî benê, çira beno wa bibo do faşîzm û asîmîlasyonî rê xizmet bikerê û na hêrîşe meşrû bikerê. Ma sey dezgeyan vanê ke, kesê ke vanê ma merdim ê, wayîrê wîjdanî yê û welatperwer ê ganî kulturê şarî bipawê û ganî no bibo wezîfeyêk.

Ma tîya ra her kesî rê gazîye kenê ke, wayîrê ziwan, kultur û tarîxê xo vejîyayîş wezîfeyê her kesî yo. Beşdarê nê festîvalî mebê û meşrû mekerê. Ma do destûr medê nê rayîr û rîyanê tarîyan.”

Gazîkerdoxî

Rêxistinê gazîkerdoxî nê yê:

“Komeleya Çand û Hunerê ya Dîjleyê,  Komeleya Lêkolînê ya Ziman û Çandên Mezopotamyayê, (Med Der) Komaleya Ekolojîyê, Enstîtuya Kurdî ya Amedê, Şanoya Bajêr a Amedê, Komaleya Jinê ya Çand, Huner û Wêjeyê, (KASED) Komeleya Hiqûqnasên Ji Bo Azadîyê, (ÖHD) Komeleya Akademîya Sînemayê ya Rojhilata Navîn,  Komeleya Wêjekarên Kurd”

MA / DÎYARBEKIR