Cerdevanî Sêrt de daran birnenê

Kurdistan de talanê xoza dewam keno. Qezaya Hawêlî ya Sêrtî de xeylêk dayî birîyayî.

Cerdevanê dewleta tirke bi paştdayîşê hukmatê Erdoganî dewa Xelîkanî ya qezaya Hawêlî ya Sêrtî de daran birnenê.

Goreyê xebera Jinnewsî dewa Xelîkanî ya qezaya Hawêlî ya Sêrtî de şewato ke 14ê tebaxe de dest pêkerd û di rojî dewam kerd, xo bi xo şî hewna.

Goreyê zanayîşê ke dewijan ra ameyî girewtene ekîbê ke semedê hewnakerdişê şewatî seba ke rayîr çîn o, destkarîya şewatî nêkerd. Dewijan vat şewat yew roje dewam kerd û xo bi xo şi hewna û newe ra vejîya û wareyê hîrayî ra vila bî.

Ame musayene ke herêma şewatî hetê dewlete ra sey herêma qedexe ameya îlankerdene. Sebebê şewatî zelal nêbî la dîmenan de yeno vînayene ke tayê cayî sey guzergahê xêzkerdeyî vêşayî.

Hetê bînî ra cerdevanê ke Qereqolê Zîyaretî ra destûr girewt, dormeyê dewa Xelîkanî de daran birnenê.

XWEBÛN