Îrmez: 3 serran de se ra 8ê daranê Şirnexî ame birnayene

MA / Zeynep Durgut / ŞIRNEX

Parlamenterê DEM Partîye yê Şirnexî Zekî dîyar kerd ke ganî vera talankerdişê xozaye veng bêro berzkerdene.

Koyanê Cûdî, Gabar û Çelênimêja yê Şirnexî de 3 serran ra nata daristanî yenê talankerdene. Gabar de gêrayîşê petrolî û Cûdî de zî madenan ver xeylê mintiqayî ameyê tehrîbkerdene. Parlamenterê DEM Partîye yê Şirnexî Zekî Îrmezî talanê xozaye ser o erjnayîşî kerdê.

‘Se ra 8ê daran ame birnayene’

Îrmezî dîyar kerd ke îqtîdar xozaya Kurdistanî kerda tîcarî û va, “3 serran de Botan de se ra 8ê daran ame birnayene. Birnayîşê daran hema zî dewam keno. Koyanê Gabar, Cûdî û Katoyî de gêrenê petrol û xoza yena talankerdene. Şîrketî yenê û pêro îmkananê xo gurînenê. ‘Qanûnê kolonyalîzmî’ yeno ramitene û goş nêkewenê waştişanê şarî. Ma do vera nê polîtîkayan de vinderê. Ma do hetê şarê xo de bê û çalakîyanê xo rimamnê.”

Besta de gêrayîşê Petrol û madenan

Îrmezî va, “Xeylê cayî seba gêrayîşê petrolî ameyê abirnayene. Hetê şîrketan ra xeylê mintiqayan de ocaxê madenan yenê akerdene. Nîya şêro do ameyox de taluke hîna bibo pîl. Na mintiqa de xeylê dewî est ê. Eke tîya bibo mintiqaya gêrayîşê madenan, daristanî do bêrê qirkerdene û xoza bêra talankerdene.”

Îrmazî dîyar kerd ke ganî vera nê talanî bi komelkî veng bêro kerdene û va, “Koyê ma û gêlîyê ma yenê talankerdiş. Dest nîyeno dewanê şarê ma ser o. Eke ma vera nê talanî vengê xo mekerê do mintiqa bi temamî bêra talankerdene. Ganî şarê ma vera talankerdişê xozaya xo wirzo payan ser.”