Şirnex de Rayraşîyayîşê Cûdîyî do bêro kerdene

Roja şemeyî vera qirkerdiş û talanê xoza Rayraşîyayîşê Cûdîyî do bêro kerdene.

Serkêşîya Têgêrayîşê Ekolojîkî yê Mezopotamya de 17ê êlule roja şemeyî de bi şîarê ‘Vera qirkerdiş û talanê xoza ma rayîr a şinê’ Rayraşîyayîşê Cûdîyî do bêro kerdene. Hetkarê Hemserekanê HDPyî yê Komîsyonê Ekolojî ra Berpirsîyar Nacî Sonmezî derheqê rayraşîyayîşî de ANFyî rê qisey kerd.
Sonmezî da zanayene ke cografyaya Kurdistanî rê cîyakerîye yena kerdene û vera talanê xozaya Kurdistanî hîsgerîye nêna mojnayene. Sonmezî vat: “Sey daristananê Mugla ganî wayîrê daranê Şirnex û Çewlîgî bêro vejîyayene. No zî têkoşînêkê hemparî wazeno. La heyf ke polîtîkaya cîyakerîye kokê nê komelî de esta. Xoza hedefê kapîtalîzmî û sermayeya mîyanneteweye de ya. Hetê bînî de zî şer esto ke tewr zaf xoza binê tesîrê şerî de manena.”
Sonmezî bale ante ser ke bitaybetî Şirnex de bi bahaneya asayîşî darî birîyenê û vat: “Eke polîtîkaya aştîye nêra caardene û welat demokratîk nêbo sîstemê ekolojî binî ta texrîb beno. Pê têkoşînê hemparî ma eşkenê şer û talanê xoza rê rayîr nêdê. Têkoşînê ekolojî û têkoşînê wayîrvejîyayîşê erjanê tarîxîyan têkoşînêko yewbîyaye yo.”
Sonmezî vist vîrî ke 17ê êlule de Rayraşîyayîşê Cûdîyî do bêro kerdene û vat: “Tirkîya ra zî rêxistin û dezgehî do tewrê nê rayraşîyayîşî bibê. Eke ma dîmenê vengê hemparî û têkoşînê hemparî bidê ma eşkenê na babete bikirişnê rojdemê rayaumûmîye. Çunke polîtîkayêka pîke ya tênatîye yena caardene. Uca de pêserameyîş zaf girîng o. Ez pê bawer a ke hêzê ma yo yewbîyaye do peynîya qirkerdişê xoza bîyaro.”

XWEBÛN