DEM Partî seba verweçînayîşî delegeyan rê gazîye kerde

Hemserekanê DEM Partî yê Amedî seba ke verweçînayîşî de raya xo bidê delegeyan rê gazîye kerde.

Partîya Têduştî û Demokrasî ya Şaran (DEM Partî), seba ke namzetanê weçînayîşê 31ê Adare dîyar bikera verweçînayîşêk virazena. Amed de zî do verweçînayîş 14-15ê Çeleyî de bêro kerdene û namzetê bajarê pîlî û qezayan do bêrê dîyarkerdene. Hemserekanê DEM Partî yê Amedî Abbas Şahîn û Pinar Sakik Tekîne pêro delegeyan rê gazîye kerde ke wa raya xo bierzê.

‘Ma wayîrê verweçînayîşî bivejîyê’

Hemserekê DEM Partî yê Amedî Abbas Şahînî dîyar kerd ke 14ê Çeleyî de do Amed de verweçînayîş bêro kerdene û eke 50+1 ke mebo zî turo dîyin do 15ê Çeleyî de bêro kerdene. Ey dîyar kerd ke turo dîyin do mabênê 2 endamanê ke înan tewr zêde rayî girewtê de bêro kerdene. Şahînî va, “Wa şarê ma û delegeye ma wayîrê verweçînayîşî bivejîyê û cewabêk bidê rejîmê qeyûman.”

Hemsereka DEM Partî ya Amedî Pinar Sakik Tekîne zî va, “Verweçînayîş do 14ê Çeleyî de saete 09.00 de dest pêbikero û saete 17.00 de biqedîyo. Ma pêro delegeyan rê gazîye kenê ke wa bêrê raya xo bierzê. Seba ke demokrasî cayê xo bigero ganî delegeyî bêrê û rayanê xo bierzê.”

MA / AMED